Infurmaziuns generalas detagliadas
infurmaziuns davart il project "armonisaziun dals registers" chattais Vus sin las paginas da l'uffizi federal da statistica (UST).
L'armonisaziun dals registers ha la finamira d'unifitgar ils registers d'abitantas e d'abitants en ils chantuns ed en las vischnancas sco er ils gronds registers da persunas da la confederaziun en il sectur dal stadi civil, da las persunas estras sco er da las fugitivas e dals fugitivs.
L'armonisaziun signifitga ch'ils differents registers vegnan midads uschia ch'els pon vegnir cumparegliads areguard il cuntegn ed areguard l'actualitad, e cumpiglia er l'introducziun d'identificaturs per intents da la statistica. Uschia pon ils registers vegnir utilisads per las futuras retschertgas statisticas davart la populaziun.
En il rom da l'armonisaziun dals registers vegni empruvà plinavant d'automatisar process existents ch'èn reglads legalmain per la communicaziun da datas tranter ils registers da persunas uffizials sin plaun federal, chantunal e communal; quai n'è betg mo in avantatg per la statistica, mabain generescha er in niz considerabel per l'administraziun.
Numerus registers communitgeschan e barattan gia oz vicendaivlamain datas en il rom da las prescripziuns legalas (p.ex. naschientschas, auters eveniments da stadi civil, entrada en Svizra). Perquai ch'i manca ina identificaziun segira e clera da las persunas, vegnan las datas dentant barattadas oz per gronda part anc a maun.
Las datas ch'existan en furma electronica ston adina puspè vegnir transferidas sin palpiri, e giu dal palpiri ston ellas puspè vegnir endatadas e controlladas a maun. En cas da dubi ston vegnir dumandadas indicaziuns pli precisas a la persuna respectiva u ad in auter uffizi. En il futur duain questas rupturas tranter ils sistems vegnir evitadas cun barattar las datas directamain. En il rom da l'armonisaziun dals registers da persunas uffizials è vegnida introducida per quest intent ina plattafurma centrala (plattafurma IKT, SEDEX) ed en ils registers pertutgads in nov numer persunal d'identificaziun (PIN, nov numer d'assicuranza da la AVS). La creaziun da la plattafurma e l'introducziun d'in PIN en ils registers ch'èn menziunads en la lescha èn elements centrals per ina colliaziun automatica da datas per la statistica, ma èn er elements impurtants per sviluppar in egovernment ch'è orientà a transacziuns.
Sco basa legala è vegnida elavurada la
lescha federala davart l'armonisaziun dals registers (LAR), en la quala èn regladas la basa legala per realisar l'armonisaziun, per introducir in identificatur da persunas e per il barat da datas tranter ils differents registers. La LAR è vegnida acceptada dal pievel ils 23 da zercladur 2006 dal parlament e messa en vigur parzialmain per il 1. da november 2006. Ils 21 da november 2007 ha il cussegl federal decidì da metter en vigur totalmain questa lescha per il 1. da schaner 2008. La lescha cuntegna pia er las disposiziuns davart ils novs numers d'assicuranza da la AVS en ils registers da persunas ch'èn numnads definitivamain en la lescha. A chaschun da la medema sesida ha il cussegl federal acceptà er l'
ordinaziun davart l'armonisaziun dals registers (OAR). Ella è er entrada en vigur il 1. da schaner 2008.
(Funtauna:
www.register-stat.admin.ch)
La regenza grischuna ha mess en vigur per il 1. da december 2010 la nova
lescha davart ils registers d'abitantas e d'abitants sco er l'
ordinaziun correspundenta. Il cussegl grond aveva approvà la lescha en la sessiun da zercladur 2010. Questa lescha regla l'execuziun da la lescha federala davart l'armonisaziun dals registers d'abitants e d'auters registers uffizials da persunas (lescha davart l'armonisaziun dals registers). Ella regla en spezial la gestiun dals registers communals d'abitantas e d'abitants sco er il domicil e la dimora.