L'uffizi dal servetsch social dal Grischun è il post chantunal spezialisà per incumbensas socialas e per projects socials ch'il chantun sto ademplir sin fundament da las disposiziuns legalas.

L'uffizi dal servetsch social dal Grischun maina servetschs socials en tut las regiuns dal chantun. Ultra da quai existan a Cuira servetschs socials spezialisads per ils suandants champs d'incumbensa:

• cussegliaziun per dumondas da dependenza
• Agid a victimas
• protecziun da l'uffant

L'uffizi chantunal dal servetsch social è cumpetent er per l'assistenza e per l'alloschament da requirentas e da requirents d'asil.

L'uffizi dal servetsch social è er il post da finanzas per l'agid social material, per prestaziuns da transfer socialas per geniturs (lescha da maternitad) e per la promoziun finanziala da purschidas da la tgira d'uffants cumplementara a la famiglia. El paja contribuziuns da gestiun e d'investiziun ad instituziuns da persunas impedidas ed ad instituziuns socialas. Las expensas da las vischnancas per l'agid social e per il pajament anticipà d'aliments vegnan messas a quint sin fundament d'in sistem da gulivaziun da las grevezzas.

L'uffizi dal servetsch social è cumpetent per la surveglianza dals uffants confidads en il chantun ed elavura las dumondas d'adopziun. El iniziescha e coordinescha ils projects socials per cumbatter la povradad. L'uffizi dal servetsch social tracta plinavant dumondas surordinadas dal sectur da la dependenza sco er da las persunas impedidas.