Uffants che creschan si u che vivan ordaifer lur dachasa geniturial vegnan numnads uffants confidads. En quest connex n'emporti betg, sch'ils uffants sa chattan en la tgira d'ina famiglia, en la tgira da di u da notg ubain en la tgira d'ina chasa da dimora. Tut la surveglianza dals uffants confidads è chaussa da l'uffizi dal servetsch social chantunal. Amez il champ da relaziuns u da tensiun da geniturs, uffant e geniturs da tgira assista l'uffizi dal servetsch social cun cussegliaziun, per ch'in uffant confidà possia crescher si sut cundiziuns optimalas.

Uffants adoptivs ed uffants confidads han ils medems dretgs sco tut ils uffants. Per ils uffants che na creschan betg si en lur atgna famiglia èsi d'ina impurtanza speziala che lur interess vegnian mantegnids e che las decisiuns vegnian prendidas per lur bainesser.

L'uffizi dal servetsch social chantunal permetta e surveglia las relaziuns da tgira per uffants da la Svizra e da l'exteriur. El è il post central chantunal per adopziuns. Tgi che ponderescha da recepir in uffant per l'adopziun u in uffant ester per la tgira e per l'educaziun, chatta qua las infurmaziuns las pli impurtantas.
 
La basa legala per ils fatgs dals uffants confidads è il dretg dals uffants (en il cudesch civil svizzer), l'ordinaziun federala davart ils uffants confidads (CS 211.222.338) e la lescha chantunala davart ils uffants confidads (DG 219.050).