Procedura
La procedura per validar prestaziuns da furmaziun ha quatter fasas: infurmaziun e cussegliaziun, bilantschaziun, giudicament, certificaziun (parziala).

Fasa 1
Persunas interessadas survegnan infurmaziuns en scrit ed ina cussegliaziun persunala, e quai – sche necessari – durant l'entira procedura. Latiers appartegnan infurmaziuns generalas davart la procedura, infurmaziuns specificas davart singulas professiuns sco er il sustegn tar l'elavuraziun dal dossier.

Fasa 2
La bilantschaziun permetta ad ina persuna d'identifitgar, d'analisar e da documentar sias cumpetenzas persunalas sco er sias cumpetenzas d'agir professiunalas.

Fasa 3
Expertas ed experts examineschan il dossier e giuditgeschan quel a maun dal profil da qualificaziun e da las reglas per cuntanscher il titel aspirà. Il giudicament ha lieu cun examinar las cumprovas e cun cumparegliar las enconuschientschas e las cumpetenzas d'agir professiunalas cun las pretensiun per cuntanscher il titel. Il resultat vegn menziunà en ina conferma da prestaziun d'emprender. Responsabels èn duas expertas u dus experts che studegian il dossier e che mainan in discurs cun la candidata u cun il candidat. Ellas ed els scrivan in rapport da giudicament.

Fasa 4a
In organ da validaziun decida tge secturs dal profil da qualificaziun ch'èn vegnids ademplids. Sche la cumpetenza d'agir professiunala necessaria è avant maun en in sectur, na sto la candidata u il candidat betg furnir ulteriuras cumprovas u examens (=　certificaziun parziala). Il resultat vegn menziunà en ina conferma da prestaziun d'emprender. A medem temp vegni inditgà tge cumpetenzas che mancan anc e co che quellas pon vegnir acquistadas.

Fasa 4b
L'autoritad d'examen controllescha las cumprovas da prestaziuns da furmaziun. I dat trais differentas modas da cumprova: certificats d'equivalenza da furmaziuns precedentas, confermas da prestaziun d'emprender ord la procedura da validaziun, protocols d'examens ord la furmaziun cumplementara.