En il rom da la lescha federala davart la furmaziun professiunala pon persunas creschidas repeter in diplom professiunal cun agid da differentas proceduras da qualificaziun. Persunas creschidas cun experientscha professiunala han trais pussaivladads d'acquistar l'attestat federal da qualificaziun.

1. Furmaziun fundamentala professiunala tenor l'art. 32 OFPr
Sche Vus pudais cumprovar in'experientscha professiunala da tschintg onns, avais Vus la pussaivladad da vegnir admess ad ina procedura da qualificaziun (examen final d'emprendissadi). En quest connex vegni spetgà che Vossas enconuschientschas praticas e professiunalas satisfetschian a las prescripziuns da furmaziun da la professiun.

2. Validaziun da prestaziuns da furmaziun tenor l'art. 31 OFPr
Tar la validaziun da prestaziuns da furmaziun vala il suandant princip: "Medems titels per medemas cumpetenzas". La finamira è quella da renconuscher las cumpetenzas che Vus avais acquistà durant la scolaziun e durant la furmaziun supplementara. En quest connex vegn premessa in'experientscha professiunala d'almain tschintg onns. La procedura da renconuschientscha ha differentas fasas, en las qualas Vus identifitgais, analisais e documentais en in dossier las cumpetenzas d'agir professiunalas acquistadas. Sche Vossas cumpetenzas satisfan a las pretensiuns per il diplom professiunal, survegnis Vus l'attestat. Uschiglio pudais Vus emplenir eventualas largias cun ina furmaziun cumplementara.

3. Emprendissadi cun contract d'emprendissadi (er pussaivel en moda scursanida)
L'emprendissadi è la via classica per cuntanscher in diplom professiunal. Il temp d'emprendissadi correspunda a l'ordinaziun da la professiun cun emprendissadi correspundenta. En cas che Vus avais gia ina furmaziun preliminara, exista la pussaivladad ch'il temp d'emprendissadi vegn scursanì. A la fin dal temp d'emprendissadi vegnis Vus admess a la procedura da qualificaziun (examen final d'emprendissadi).

Discurs d'infurmaziun individual
Per chattar or tge via ch'è la pli raschunaivla per Vus, As recumandain nus in discurs d'infurmaziun individual. Per plaschair empleni il formular da contact agiuntà ed al tramettai enavos a nus. Suenter vegnin nus ad As contactar.