La promoziun da la cultura dal Grischun sa basa sin la lescha per promover la cultura e sin l'ordinaziun tar la lescha per promover la cultura. Il chantun s'engascha per ina vasta vita culturala e per ina viva confruntaziun cun las tradiziuns vividas. Ultra dal sustegn da la diversitad culturala cumpiglia quai er la tgira da la cultura, l'intermediaziun da la cultura sco er il mantegniment e la promoziun da la trilinguitad chantunala. En sia totalitad duai la promoziun chantunala pussibilitar ad uschè bleras gruppas da la populaziun sco pussaivel da sa participar a la vita culturala.

La promoziun chantunala da la cultura conceda contribuziuns unicas a projects da differentas spartas. I vegnan sustegnidas activitads culturalas e furmas artisticas experimentalas, popularas ed etablidas. La promoziun chantunala da la cultura conceda sias contribuziuns adina sco cumplettaziun da las contribuziuns da persunas privatas e da vischnancas. Ultra da quai sustegna il chantun instituziuns culturalas d'impurtanza chantunala cun subvenziuns periodicas annualas.

Il chantun Grischun promova er artistas ed artists professiunals cun contribuziuns ad ovras che vegnan publitgadas e surdadas mintga onn en il rom da concurrenzas. En cooperaziun cun differentas instituziuns vegnan concedids segiurns d'atelier a Berlin u pajadas contribuziuns als custs da viver per il segiurn en l'atelier da visarte Grischun a Paris.

Sin proposta da la cumissiun per promover la cultura conceda la regenza mintga onn premis da promoziun e premis da renconuschientscha. Prestaziuns extraordinarias culturalas e scientificas pon vegnir onuradas cun il premi grischun da cultura.