Il svilup da la scola è in process dal svilup ch'è definì en il temp e che ha consequenzas per l'entir sistem da scola resp. per tut las scolas en il chantun. En quest connex poi sa tractar da svilups resp. da projects che concernan la pedagogia, la pedagogia speziala, las finanzas sco er l'organisaziun. Il svilup da la scola vegn coordinà, damai ch'el cumpiglia tut las scolas dal Grischun. Cunquai ch'il chantun surpiglia las incumbensas interdisciplinaras, pon las autoritads da scola sco er las persunas d'instrucziun sa concentrar sin las incumbensas centralas sco l'organisaziun da la scola e l'instrucziun.

En enclegientscha cun las instituziuns ch'èn responsablas per la scola po la regenza permetter experiments da scola. Entant che projects da svilup da la scola èn situads en il rom da las prescripziuns legalas vertentas, pon experiments da scola divergiar da las prescripziuns da questa lescha. Experiments da scola pon servir ad examinar novas furmas d'instruir e d'educar ubain novs concepts pedagogics ed organisatorics. Experiments da scola èn limitads localmain e temporalmain.