Sco mesira per promover las linguas chantunalas rumantsch u talian datti la pussaivladad da manar ina scola u singulas classas parallelas en moda bilingua en il senn d'ina immersiun parziala tenor las directivas da l'uffizi per la scola populara ed il sport.

La finamira d'ina tala scola è la bilinguitad. La mesadad dals roms vegn instruida per tudestg, l'autra mesadad per rumantsch u per talian. Las scolaras ed ils scolars emprendan uschia dal cumenzament ennà da duvrar omaduas linguas sco instrument da reflexiun e da communicaziun. Uschia sa lascha er cuntanscher en la segunda lingua ina cumpetenza linguistica che na vegn gnanc cuntanschida approximativamain cun l'instrucziun convenziunala.

Quest sistem da scola è oravant tut adattà per scolas ch'eran fin ussa tudestgas u per scolas en las vischnancas al cunfin linguistic. El ha en mira da realisar ina cumpetenza linguistica fitg auta en duas linguas (cumpetenza da lingua materna en omaduas linguas).

En il senn da las directivas menziunadas vegnan manadas actualmain las suandantas scolas sco scolas bilinguas: scola primara da Bever (rumantsch/tudestg), scola primara da Beiva (talian/tudestg), scola primara da Schlarigna (rumantsch/tudestg), scola primara da Glion (tudestg/rumantsch), scola primara da Malögia (talian/tudestg), scola primara da Puntraschigna (rumantsch/tudestg), scola da Samedan (rumantsch/tudestg), scola primara da Trin (rumantsch/tudestg). La scola da la citad da Cuira è tudestga. Ella ha dentant er singulas classas bilinguas (tudestg/talian e tudestg/rumantsch).