La scolina promova las abilitads creativas da l'uffant e ses svilup corporal, spiertal e social. Ella enritgescha il mund d'eveniments e d'experientschas da l'uffant e tgira l'expressiun linguistica da l'uffant. Uschia prepara la scolina l'uffant per l'entrada en scola.

La scola populara promova las forzas creativas, las enconuschientschas e l'abilitad da giuditgar dals uffants. Ella als sustegna en lur svilup a persunalitads independentas. En il center stattan l'acquist da cumpetenzas socialas ed il manar ad in agir cun responsabladad. Ils med d'instrucziun èn ina premissa essenziala per pudair concepir ina buna instrucziun, en la quala ils interess ed ils basegns da tut ils uffants vegnan resguardads.

La scola speziala porscha als uffants cun basegns spezials areguard la pedagogia in sustegn ch'è adattà a l'individi, e quai cun mesiras pedagogic-terapeuticas. Pli e pli vegnan ils uffants cun basegns spezials areguard la pedagogia integrads en la scola populara cun agid d'in sustegn professiunal e terapeutic.

La promoziun dals duns ha la finamira da sustegnair ils uffants ed ils giuvenils cun duns spezials uschè bain sco pussaivel cun integrar els en il rom da l'instrucziun regulara. L'onn 2000 ha il chantun sviluppà in concept per quest intent. Quel vegn applitgà er vinavant, cun excepziun da las explicaziuns davart ils centers da promoziun.