Il sectur da l'educaziun sportiva s'occupa da tut las dumondas specificas dal sport da scola.

Dis da sport chantunals

Il Grischun coordinescha las occurrenzas chantunalas da sport da scola e gida las organisaturas ed ils organisaturs a las administrar. En il decurs da l'onn cumpetan en tut var 2000 giuvenils als divers dis da sport en las disciplinas ballarait, unihockey, ballabasket, cursa d'orientaziun, ballape ed atletica leva e cumbattan per la qualificaziun per il di da sport federal.
Mintga onn sa rendan pia var 100 represchentantas e represchentants da las scolaras e dals scolars grischuns al lieu da la concurrenza respectiva e cumpetan cun giuvenils d'auters chantuns.

Cussegliadras e cussegliaders da gimnastica

En il chantun Grischun è en vigur l'uschenumnà sistem da cussegliaziun da gimnastica. En tut sustegnan 38 spezialistas e spezialists las scolas da lur circul da cussegliaziun da gimnastica. Las cussegliadras ed ils cussegliaders da gimnastica cusseglian la magistraglia en dumondas da l'instrucziun da gimnastica e da sport sco er dal sport da scola voluntar. Ellas ed els han la scolaziun d'in coach da scola G+S ed èn pia er las persunas da contact per ils fatgs da giuventetgna + sport.

Examen da sport da scola

La cussegliadra u il cussegliader da gimnastica è cumpetent per l'organisaziun e per la realisaziun da l'examen da sport da scola a la fin dal 8. onn da scola. Circa 2000 scolaras e scolars exerciteschan las differentas disciplinas durant l'onn ed absolvan quest test da sport a la fin da l'onn.
L'examen da sport da scola è in med impurtant per controllar la qualitad da l'instrucziun da sport.

Furmaziun supplementara da las persunas d'instrucziun

In instrument impurtant per garantir la qualitad da l'educaziun sportiva è la furmaziun supplementara da las persunas d'instrucziun. Per las persunas d'instrucziun organisescha e coordinescha la furmaziun supplementara da las persunas d'instrucziun dal Grischun differents curs da perfecziunament en il sectur dal sport. Quests curs vegnan publitgads mintgamai sut actualitads > sport > furmaziun supplementara. L'annunzia ed ils detagls specifics davart ils curs chattais Vus sin la pagina d'internet da la furmaziun supplementara da magistras e da magisters dal Grischun.
Las cussegliadras ed ils cussegliaders da gimnastica organiseschan mintga onn in curs regiunal davart in tema da sport actual, e quai en Voss circul da scola. Ils temas dals curs regiunals vegnan preparads mintgamai da las cussegliadras e dals cussegliaders da gimnastica sco er da spezialistas e da spezialists en in curs da 2 dis. Las publicaziuns dals curs regiunals vegnan fatgas adina directamain tras las scolas, tras il fegl d'infurmaziun da l'inspecturat, e sa chattan sut la rubrica actualitads > sport > furmaziun supplementara.

Sport da scola G+S

Dapi l'atun 2008 pon vegnir annunziads er curs da G+S per uffants da 5 fin 10 onns tar giuventetgna + sport. Questa categoria da vegliadetgna vala sco atgna "disciplina" e sto avair manadras u manaders cun ina renconuschientscha speziala da G+S. Las infurmaziuns detagliadas chattais Vus sut J+S-Kids.

La persuna da contact per las purschidas da G+S en scola è la u il coach da scola G+S, respectivamain la cussegliadra u il cussegliader da gimnastica da la regiun en dumonda (vesair glista da las cussegliadras u dals cussegliaders da gimnastica).
La noziun scola cumpiglia tut las scolas publicas e privatas dals stgalims primar e secundars I e II sco er tut las instituziuns spezialas da furmaziun e d'educaziun renconuschidas dal stadi.