20 da las totalmain 34 presidentas communalas en uffizi, elegidas ed anteriuras en il chantun Grischun èn sa scuntradas per la conferenza annuala che ha gì lieu quest onn a Falera. Silvia Casutt, presidenta communala da Falera, ha beneventà las participantas en il center da cultura "la fermata" ed infurmà davart la vischnanca sco er davart la corporaziun regiunala Surselva. Silvia Hofmann, manadra dal post da stab per l'egualitad da las schanzas, ha moderà l'occurrenza ed ha fatg attent en ses pled d'avertura a las pretensiuns cuntradictoricas che vegnan fatgas a las dunnas en uffizis executivs.