La basa da nossa lavur è l'art. 8 al. 3 da la constituziun federala sco er la lescha d'egualitad:
- "Um e dunna han ils medems dretgs. La lescha procura per lur egualitad giuridica ed effectiva, spezialmain en quai che pertutga la famiglia, la scolaziun e la lavur. Um e dunna han il dretg da la medema paja per ina lavur equivalenta."
La pratica ha malavita anc adina in auter aspect, perquai ans engaschain nus per l'egualitad da dunna ed um en tut ils secturs da la vita e per l'eliminaziun da scadina furma d'ina discriminaziun directa ed indirecta.
Nus cussegliain per telefon ed en discurs individuals persunas, organisaziuns, intrapresas ed autoritads en tuttas dumondas che pertutgan l'egualitad, spezialmain dumondas davart
- egualitad da las pajas, protecziun cunter desditgas, gravidanza e lavur, mobbing, mulestas sexualas, fatgs d'assicuranza sociala, furmaziun professiunala, return en la professiun e.u.v.
Nus iniziain ed exequin projects, savens en collavuraziun cun auters uffizis e cun autras instituziuns.
Nus infurmain la publicitad tras campagnas, broschuras e studis. Sin dumonda referin ed infurmain nus in public interessà. Ils rapports annuals dattan ina invista en noss differents champs da lavur ed en nossas diversas activitads.
Nus documentain dumondas specificas d'egualitad e las rendain accessiblas a circuls interessads:
Nus observain e giuditgain currentamain il stadi da l'egualitad sin plaun chantunal e federal. Tranter auter prendain nus part a la legislaziun tras consultaziuns pertutgant ils aspects d'egualitad. In aspect è qua er la realisaziun da l'egualitad linguistica: Dunnas ed umens duain vegnir appellads tuttina.
Nus lavurain en ina rait tgirain ina collavuraziun orientada stretgamain tenor temas cun differentas organisaziuns e persunas singulas. Quai ans pussibilitescha ina lavur d'egualitad effizienta e professiunala.