La cumissiun dal cussegl grond per economia, taxas e politica da stadi ha tractà las revisiuns parzialas da la lescha da vischnancas e da la lescha davart la gulivaziun da finanzas  

24.11.2005
La cumissiun per economia, taxas e politica da stadi (CETPS) ha predeliberà la missiva concernent las revisiuns parzialas da la lescha da vischnancas e da la lescha davart la gulivaziun da finanzas dal chantun Grischun en preschientscha da cusseglier guvernativ Hansjörg Trachsel. La fatschenta vegn tractada dal cussegl grond en la sessiun da december.

Sco quai che la regenza scriva en sia missiva, han ils dus projects differents puncts cuminaivels. Els servan a realisar la constituziun chantunala, la sanaziun da las finanzas ed il program da la regenza. Il numnader cuminaivel il pli impurtant è la promoziun da la collavuraziun intercommunala e da fusiuns da vischnancas. Cun mesiras da promoziun correspundentas e cun l'eliminaziun d'impediments vuless la regenza dar la direcziun per ina refurma da las structuras territorialas.

En la lescha da vischnancas dal chantun Grischun vegnan actualisadas las disposiziuns davart la collavuraziun intercommunala e quellas davart la fusiun da vischnancas. En connex cun la fusiun da vischnancas èn vegnidas fatgas cumplettaziuns en ils secturs da la promoziun e dal sforz. Tras la revisiun da la lescha da vischnancas vegn ultra da quai stgaffida la basa legala per reorganisar las corporaziuns regiunalas.

Tras la nova lescha davart la gulivaziun da finanzas e tras l'ordinaziun executiva respectiva duain vegnir rinforzads ils impuls per fusiuns da vischnancas ed eliminads impediments existents. En la missiva propona la regenza per quest intent in nov model per la gulivaziun da la forza fiscala ed ina nova regulaziun en connex cun la resalva persunala per contribuziuns ad ovras publicas.

Entant che la CETPS va d'accord cun tut ils puncts che la regenza propona en la missiva tar la lescha davart la gulivaziun da finanzas e tar l'ordinaziun executiva respectiva, fa ella differentas propostas da midar la lescha da vischnancas. Uschia vuless la CETPS midar ils statuts da las corporaziuns regiunalas e da las corporaziuns da vischnancas en quel senn ch'il referendum da las vischnancas sco er da las votantas e dals votants na duess betg mo esser pussaivel cunter tscherts conclus da la radunanza da delegadas e da delegads, mabain er cunter conclus da la radunanza regiunala. Cunquai che mintga vischnanca sto appartegnair ad ina corporaziun regiunala, vuless la cumissiun plinavant ch'ina vischnanca duess pudair s'associar mo en cas excepziunals cun in'autra corporaziun regiunala per ademplir tschertas incumbensas. Ina minoritad da la cumissiun propona ch'ils statuts da las corporaziuns regiunala stoppian prevair stringentamain che la suprastanza regiunala vegnia elegida da la totalitad da las abitantas e dals abitants da la corporaziun cun dretg da votar. In'autra minoritad da la cumissiun vuless che l'artitgel che prevesa da pudair far votaziuns consultativas en il rom da projects e da tractativas davart ina fusiun da vischnancas vegnia stritgà senza cumpensaziun. Dal rest è la cumissiun suandada per gronda part las propostas da la regenza ed ha la finala deliberà la missiva da la regenza per mauns dal cussegl grond.

Gremi: cumissiun per economia, taxas e politica da stadi
Funtauna: rg cumissiun per economia, taxas e politica da stadi