Navigation

Inhaltsbereich

  • Erste Mitteilung
  • Neuen Beitrag einfügen
La cumissiun dal cussegl grond ha deliberà la missiva da la regenza tar la refurma da la gulivaziun da finanzas per mauns da la sessiun da december 2013 dal cussegl grond.

La cumissiun per politica da stadi e strategia dal cussegl grond ha predeliberà la missiva da la regenza tar la refurma da la gulivaziun da finanzas (refurma da la GF) en preschientscha da la cussegliera guvernativa Barbara Janom Steiner, sco scheffa dal departament da finanzas e vischnancas, ed en preschientscha da represchentantas e represchentants da l'administraziun. La cumissiun ha salvà pliras sesidas d'in di e deliberà la missiva per mauns dal cussegl grond. Il cussegl grond vegn a tractar questa fatschenta en la sessiun da december 2013.

La gulivaziun da finanzas intrachantunala actuala ha grevas mancanzas e sto vegnir revedida. La refurma da la gulivaziun da finanzas duai cunzunt rinforzar las vischnancas. Ella procura per ina gulivaziun da finanzas gista ed effizienta tranter las vischnancas e mitigescha grevezzas spezialas ch'èn d'attribuir a las structuras. Ultra da quai duai vegnir simplifitgada la finanziaziun da las incumbensas publicas dal chantun e da las vischnancas ed ella duai vegnir realisada en concordanza cun las cumpetenzas. Cun la refurma da la GF duai vegnir introducida ina gulivaziun da las resursas e da las grevezzas dal tuttafatg nova. La refurma da la GF resguarda l'interess general ed ha clers avantatgs envers il sistem vertent che ha in concept da basa che datescha da l'onn 1958.

La cumissiun predeliberanta è dal medem avis sco la regenza, tenor il qual igl exista in basegn d'agir grond ed urgent. En quest senn èsi stà incontestà d'entrar en la fatschenta. En la tractativa detagliada accepta la cumissiun da princip e per gronda part las propostas da la regenza. Opiniuns e propostas divergentas hai dà principalmain tar la gulivaziun da las resursas, tar la quala las vischnancas turisticas duajan vegnir resguardadas pli fitg; tar la gulivaziun da las grevezzas socialas, nua che l'agid chantunal a las vischnancas duai cumenzar pli baud; tar la fixaziun da l'import da las pauschalas per la scola regulara che van a favur da la scolina, da la scola primara e da las scolas secundaras e realas, pauschalas che duajan – tenor l'avis unanim da la cumissiun – esser pli autas che quellas da la missiva. Per ina proposta da la minoritad da la cumissiun ha ultra da quai procurà er il sectur da la finanziaziun da las scolas medias. Tenor l'avis da la cumissiun duai il chantun ultra da quai avair vinavant la pussaivladad da sustegnair projects innovativs sut tschertas cundiziuns en ils secturs tractament da l'aua persa e protecziun da l'ambient.

Il project che sto vegnir tractà durant la sessiun da december 2013 cumpiglia la revisiun totala da la lescha davart la gulivaziun da finanzas e las revisiuns parzialas da 20 leschas e da 3 ordinaziuns. 
 

Infurmaziuns:
Bruno W. Claus, president da la cumissiun per politica da stadi e strategia, tel. 081 300 33 70


Gremi: cumissiun per politica da stadi e strategia
Funtauna: rg chanzlia chantunala dal Grischun
Neuer Artikel