Navigation

Inhaltsbereich

Las elecziuns dal cussegl naziunal han lieu mintga quatter onns la penultima dumengia d'october. Il termin per l'elecziun da renovaziun dal cussegl naziunal per la perioda d'uffizi da quatter onns che cumenza cun la sessiun d'enviern 2015 è dumengia, ils 18 d'october 2015. Ils tschintg mandats dal chantun Grischun en il cussegl naziunal vegnan surdads tenor la procedura electorala da proporz. Il dretg d'eleger han quellas persunas che han il dretg da votar. Elegiblas resp. elegibels èn las candidatas ed ils candidats che figureschan sin las glistas. Per las elecziuns dal cussegl naziunal en il chantun Grischun valan ils suandants termins:  
  • Emprim termin pussaivel per inoltrar glistas electoralas: 18 da matg 2015
  • Ultim termin per inoltrar glistas electoralas (ston arrivar fin il pli tard las 18.00 tar la chanzlia chantunala): 3 d'avust 2015
  • Ultim di per midar da las glistas inoltradas: 10 d'avust 2015
  • Ultim di per explitgar colliaziuns da glistas: 10 d'avust 2015
  • Publicaziun da las glistas electoralas: 11 d'avust 2015
  • Publicaziun da las glistas electoralas en il fegl uffizial: 13 d'avust 2015
  • Elecziuns dal cussegl naziunal: 18 d'october 2015
       

Quests termins ed ulteriuras infurmaziuns èn vegnids publitgads en il fegl uffizial dal chantun dals 15 da schaner 2015. Formulars per l'inoltraziun da las glistas electoralas pon vegnir retratgs tar la chanzlia chantunala.


Regulaziun per numerar las glistas e novs termins
Las glistas vegnan numeradas tenor la successiun da las propostas electoralas inoltradas. Sche pliras glistas electoralas vegnan inoltradas il medem di, decida la sort davart la numeraziun. En cumparegliaziun cun las ultimas elecziuns dal cussegl naziunal è vegnì anticipà il termin final per inoltrar las glistas da candidats (3 d'avust 2015) sco er il termin per rectifitgar las glistas e per explitgar colliaziuns da glistas (10 d'avust 2015). La regenza grischuna ha concludì ina revisiun parziala correspundenta da l'ordinaziun davart las elecziuns dal cussegl naziunal ed ha mess en vigur quella per il 1. da schaner 2015. L'anticipaziun dal termin final per inoltrar las glistas da candidats permetta da trametter ils documents d'elecziun pli baud a las vischnancas (da nov sis emnas avant il di d'elecziun). Las votantas ed ils votants survegnan ils documents d'elecziun il pli baud quatter, il pli tard trais emnas avant il di d'elecziun.

 

Eventuals sbagls tar singuls cudeschets dals cedels electorals
La chanzlia chantunala renda attent che singuls cudeschets dals cedels electorals, che las vischnancas han tramess ils ultims dis a las electuras ed als electurs per las elecziuns dal cussegl naziunal dals 18 d'october 2015, pon avair sbagls. Pervia d'in sbagl da producziun cuntegnan singuls cudeschets dals cedels electorals duas giadas tschertas glistas, entant che autras glistas mancan. A las electuras ed als electurs vegni recumandà da controllar exactamain lur material electoral. Eventuals cudeschets dals cedels electorals cun sbagls pon las electuras ed ils electurs barattar tar lur vischnanca da domicil cunter exemplars cumplets e corrects. Las vischnancas èn gia vegnidas infurmadas correspundentamain.