La migraziun è in process global che envida er la societad e la politica dal chantun Grischun a s'occupar da la tematica.
La societad da maioritad s'avischina a las persunas immigradas. Quai è in process vicendaivel e dinamic che pretenda da las migrantas e dals migrants ch'ellas ed els sa stentian activamain per l'integraziun. A medem temp premetta el che la populaziun indigena saja averta e mussia in clima da renconuschientscha e da stima.

Actualmain vivan burgaisas e burgais da var 120 pajais en il Grischun. Circa dus terzs dals 193 stadis ch'èn renconuschids sin plaun internaziunal èn represchentads en il chantun. La vita culturala e linguistica multifara furma pia il mintgadi en il Grischun e premetta ina buna enclegientscha tranter las differentas gruppas da la populaziun e las differentas regiuns.

Da mintga singula persuna vegni pretendì ch'ella s'engaschia per ina cuminanza paschaivla e constructiva. Purschidas da material d'infurmaziun objectiva, sco il portal d'infurmaziun "Integraziun Grischun" promovan questas atgnas prestaziuns che sustegnan la societad e gidan a promover il respect vicendaivel e la prontezza per in dialog.