Mars 2023 Rutas signalisadas nov er per las cursas da trail Sin iniziativa dal project da la NPR, la nova politica regiunala, graubünden Trailrun ha l’Uffizi da construcziun bassa dal Grischun sco post spezialisà per il traffic betg motorisà elavurà ensemen cun las Sendas grischunas e Svizra Mobil ina integraziun da rutas da cursa da trail en la signalisaziun existenta da las sendas da viandar. Cun quella soluziun vegnan valitadas las cursas da trail sco sutfurma dal viandar e las rutas da viandar vegnan cumplettadas sin lur quadret da ruta cun la noziun «Trailrun-Tipp». En ina fasa da pilot durant l’onn current vegn agiuntà tar tschintg rutas da viandar existentas il tip da cursa da trail: Las rutas Senda Ruinaulta, Pazolastock-Rheinquelle-Weg, Dreibündenstein Panoramaweg, Jöriseen Rundweg e la Senda Muottas da Schlarigna vegnan provedidas questa primavaira supplementarmain cun il nov quadret da ruta e publitgadas tar schweizmobil.ch sco tip da cursa da trail. Per la stagiun da stad 2024 pon ulteriuras destinaziuns grischunas e vischnancas inditgar rutas da viandar existentas ed er novas e las signalisar sco cursa da trail. Il post spezialisà vegn a spedir proximamain ina infurmaziun correspundenta davart l’agir concret. Nagin n’è memia pitschen per esser in pendulari cun velo L’acziun da participaziun Bike2school motivescha scolaras e scolars da 10 fin 20 onns da prender il velo per ir a scola. Gruppas da classa percurran durant quatter emnas uschè savens sco pussaivel la via da scola cun il velo. Mintga di da scola, en il qual il velo è vegni duvrà per far la via, survegn mintga participantA in punct e tants kilometers, sco ch’el/ella ha fatg. Da gudagnar datti divers premis da gruppa. Tut quels ch’èn ids almain diesch giadas cun velo a scola, prendan ultra da quai part a la tratga da premis attractivs per singuls. Animads da la concurrenza e da l’experientscha en classa vegnan intgantadas scolaras e scolars dal tuttafatg natiral ed automaticamain per l’ir cun velo. L’acziun da primavaira va dapi il marz 2023, s’annunziar pon ins fin ils 11 da matg 2023. La campagna da fairtrail parta 2023 per la proxima stagiun da viandar ed ir cun mountainbike– e quai gia per la quarta giada! Viandar ed ir cun velo da muntogna vegnan pli e pli en moda, tant tar ils signurs sco tar la dunnas svizras. Quai po manar a chaus cotschens sper singuls hotspots er sin la rait da vias la pli gronda da la Svizra. Perquai èsi impurtant da propagar er en la quarta stagiun da fairtrail la cuminanza amicabla vivida cun viandar ed ir cun velo e da la sustegnair cun pliras acziuns. En la broschura actualisada chattan il concept da fairtrail, decleraziuns interessantas davart las reglas sin las sendas grischunas ed ina safari tras il Grischun lur plazza. Plinavant datti natiralmain ils regalins tschertgads da fairtrail, sco il scalin dals urs, il zucher d’ivas u il set d’implasters. Er durant questa stagiun pon purtaders da servetsch grischuns retrair material da sustegniment varià cun quest link. Duvrai vinavant ils regalins sco purtaders da noss messadi da fairtrail en il contact cun giasts e clients. Faschai allusiun a la situaziun particulara da la cuminanza paschaivla tar nus en Grischun. Noss documents digitals as gidan er a far quai. Inscunters segirs cun chauns da protecziun e scossas da vatgas-mamma Co ma deport jau correctamain, sche jau entaup nunspetgadamain scossas da vatgas-mamma u chauns da protecziun da muntaneras? Las Sendas grischunas organiseschan en collavuraziun cun il center da furmaziun e cussegliaziun Plantahof a Landquart er quest onn puspè curs pratics davart quels temas. Il spezialist per vatgas-mamma Andrea Accola dat als participants dal curs invistas interessantas en las atgnadads d’ina scossa da vatgas-mamma e deducescha da quellas il deport correct per in inscunter. Jan Boner sco spezialist per la protecziun da muntaneras intermediescha buns tips per il deport inditgà en cas d’in inscunter cun scossas tgiradas da chauns da protecziun. Las offertas sa drizzan a tut ils interessads, ch’èn savens per via en regiuns d’alpegiada: annunzia chaun da protecziun da muntaneras annunzia scossas da vatgas-mamma Nua faschevan ils chalzers da viandar il pli mal? L’onn 2022 ha l’Uffizi da construcziun bassa dal Grischun sco post spezialisà per il traffic betg motorisà laschà far per la sisavla giada en fila l’analisa da reclamaziuns davart il viandar. 15 organisaziuns – tuttas furnituras da servetschs dal turissem, dal transport e dal viandar – han rimnà durant l’entira stagiun reclamaziuns da giasts. L’institut per turissem e temp liber da la scol’auta spezialisada grischuna (SAS) – ha evaluà quellas reclamaziuns, las gruppadas tematicamain e las interpretadas en in rapport. Il numer total da 135 reclamaziuns è il pli bass dapi ch’ins registrescha ellas sistematicamain; la quantitad la pli gronda è vegnida registrada l’onn da pandemia 2020, era dentant mo pauc pli gronda che 2019. Il cuntegn da las reclamaziuns da giasts concerneva il pli savens la rait da sendas, suandà da la signalisaziun e da conflicts cun autras gruppas d’utilisaders, la reclamaziun la pli frequenta 2021. Da l’autra vart èn vegnidas inoltradas mo duas reclamaziuns davart il tema vatgas-mamma e protecziun da muntaneras. Il rapport pon ins leger sin la pagina d’internet da l’Uffizi da construcziun bassa. Save the Date: Dieta davart il traffic betg motorisà 2023 Las preparativas per la proxima realisaziun da la dieta davart il traffic betg motorisà èn puspè en gir. L’occurrenza ha lieu ils 6 d’october 2023 en l’aula da la SAS a Cuira. Reservai gia oz il termin per in’ulteriura dieta davart il traffic betg motorisà, prevesids èn puspè referats interessants e discussiuns inspirantas. Ulteriuras infurmaziuns davart l’andament ed il program suondan en las proximas newsletters u sin la pagina d’internet fachtagung-langsamverkehr.ch. Uffizi da construcziun bassa, Servetsch per il traffic betg motorisà Loëstrasse 14, CH-7001 Chur Tel. +41 81 257 37 12  •  flv@tba.gr.ch  •  Pagina-web © 2023 Uffizi da construcziun bassa, Servetsch per il traffic betg motorisà. Tut ils dretgs resalvads.

In Shared Service da Graubünden Ferien