Matg 2023 Far plazza per giasts americans Per che tut quels ch’èn per via sin las sendas ed ils trails grischuns possian vinavant sa scuntrar cun calma, parta la campagna «Fairtrail Graubünden» en la tschintgavla stagiun. A la Cycle Week a Turitg è la campagna 2023 vegnida averta ils 12 da matg 2023 cun la preschentaziun dal clip il pli nov cun Nino Schurter. Er il campiun mundial dieschupel da velo da muntogna s’engascha cun quest testimonial pertschertamain per las finamiras da «fairtrail». «Jau hai la fortuna da pudair trenar sin ils trails grischuns. Igl è per mai ina vaira chaussa dal cor da gidar a mantegnair questa bella infrastructura per la generaziun vegnenta », motivescha Schurter ses engaschament. En il davos clip da la campagna entaupa Schurter aut sur Tavau ina gruppa da trekking extraordinaria. Ils divers meds d’agid e regalins tar la campagna, sco p.ex. ils scalins da fairtrail, pon vinavant vegnir empustads qua. Il Grischun pedalescha anc pli fermamain en il traffic betg motorisà En il rom da la nova politica regiunala da la Confederaziun (NPR) finanziescha la regenza grischuna ensemen cun la Confederaziun il project «graubünden BIKE 2023-2026» cun 2.5 milliuns francs. Il project ha en mira d’etablir il Grischun sco spazi vital attractiv e d’introducir il proxim pass da svilup en l’offerta da velo. La realisaziun da la mesiras succeda en stretga collavuraziun cun las destinaziuns e vischnancas sco er auters acturs dal traffic betg motorisà. Tut ils partenaris èn envidads da prender part activamain al project e da gidar a concepir «graubünden Bike». Ils proxims lavuratoris han lieu ils 27 da zercladur ed ils 7 da settember 2023. La direcziun dal project sa chatta en ils mauns da la firma Allegra da Puntraschigna. La gruppa directiva sa cumpona da l’Uffizi da construcziun bassa ensemen cun il post spezialisà per il traffic betg motorisà, Grischun vacanzas e l’Uffizi per economia e turissem. Qua vai tar la communicaziun da la regenza areguard la partenza dal project. 15 km via da velo tras il Mesauc avant la finiziun Las vischnancas mesolcinaisas Grono, Roveredo e San Vittore realiseschan da preschent la via da velo coerenta la pli lunga dal chantun Grischun. Il project nizzegia la bella coincidenza ch’il trassé da l’anteriura viafier da Bellinzona a Mesocco è restà en la part sut dal Mesauc sur gronds tschancuns liber da surfabricaziuns, schebain ch’il traffic da persunas è vegnì sistì già 1972 ed il traffic da martganzia 2003. Il traject fin al cunfin cun il Tessin ha ina lunghezza da 6,6 km, da là davent vegnan las vischnancas tessinaisas a cuntinuar cun la via da velo fin a la staziun da Castione-Arbedo. Suenter la fin da la lavurs vegn pia ad esser a disposiziun ina via da velo da 15 km quasi senza interrupziuns, da Grono al center da Bellinzona, per ir a lavurar u per sa divertir en il temp liber. Il chantun Grischun sustegna las trais vischnancas cun ina contribuziun chantunala da 2,25 miu. francs. Quai è la contribuziun chantunala la pli gronda ad in project da via da velo fin ussa. L’avertura è prevesida per l’entschatta da la stad 2023. Label d’hotel per hotels da trailrunning Il basegn da far vacanzas individualas cumbinadas cun culminaziuns sportivas ed aventuras nunemblidaivlas en muntogna è creschì fermamain ils ultims onns. Blers aderents dal sport da currer tschertgan alloschis adattads per lur congedi da trailrunning tut persunal. Da l’autra vart datti blers hotels ch’han gia offertas interessantas en connex cun trailrunning ed adempleschan ils criteris d’in tal hotel. Per che quellas offertas e criteris cuntanschian in standard da qualitad unifitgà e possian vegnir communitgads a gruppas da destinaturs definidas, è vegnì lantschà l’avrigl 2023 il label d’hotel Swiss Running. Ils criteris ch’in hotel da Swiss Running sto ademplir èn vegnids elavurads en il rom dal project da NPR graubünden Trailrun en collavuraziun cun las differentas destinaziuns da turissem. graubünden Trailrun sustegna hotels grischuns da trailrunning e surpiglia ils custs annuals per l’onn da lantschada 2023. Il Grischun è per l’emprima giada il numer in en il trailrunning Il studi da perscrutaziun dal martgà davart il tema trailrunning ch’è vegnì fatg per la terza giada suenter 2020 e 2022 mussa cleramain: Il Grischun è il hotspot dal trailrunning en la regiun alpina da lingua tudestga. Adina dapli destinaziuns prendan en mira quel divertiment al liber ed ins po observar cleramain ch’il Grischun ha surpiglià la rolla da manader. Trailrunning, pia currer sin vias da terra betg francada, è sa sviluppà fermamain ils davos onns. Ed ils resultats da las ultimas retschertgas mussan, che quel svilup resta constant. Bunamain in terz da la populaziun svizra è affina per il sport anc giuven e n’excluda betg da far vacanzas alpinas colliadas cun tut. Cunzunt il chantun Grischun è bainvis tar las curriduras ed ils curridurs da trail – per l’emprima giada maina il Grischun il ranking dals chantuns, en ils quals il dumber dals aderents da quel sport è creschì il pli ferm. Save the Date: Dieta davart il traffic betg motorisà 2023 Las preparativas per la proxima realisaziun da la dieta davart il traffic betg motorisà èn puspè en gir. L’occurrenza ha lieu ils 6 d’october 2023 en l’aula da la SAS a Cuira. Reservai gia oz il termin per in’ulteriura dieta davart il traffic betg motorisà, prevesids èn puspè referats interessants e discussiuns inspirantas. Ulteriuras infurmaziuns davart l’andament ed il program suondan en las proximas newsletters u sin la pagina d’internet fachtagung-langsamverkehr.ch. Uffizi da construcziun bassa, Servetsch per il traffic betg motorisà Loëstrasse 14, CH-7001 Chur Tel. +41 81 257 37 12  •  flv@tba.gr.ch  •  Pagina-web © 2023 Uffizi da construcziun bassa, Servetsch per il traffic betg motorisà. Tut ils dretgs resalvads.

In Shared Service da Graubünden Ferien