| La Mar Naira vegn pli datiers dal Grischun! |
| …almain per viandants cun velo: la fin da zercladur è vegnida averta in'ulteriura etappa da l'engrondiment da la via da velo a l'En en Engiadina bassa. Sin dus kilometers tranter l'ovra al cunfin dad Ovella e Pra Dadora pon ins ussa laschar ir ses velo e giudair a medem temp la cuntrada imposanta che sumeglia ina chavorgia. Grazia ad ina surfatscha fina, facilmain rullanta da la via ed ina pendenza moderada ési in giudiment per viandants cun velo da tut gener. Ils temps stentus, cur ch'il traffic da velo sa stueva fullar malamain via tras la galaria stgira e sturschida da la via d'Engiadina èn passads, uschè spert, sco ch'ins po midar en ina gronda transmissiun. Per la planisaziun d'ina tura d'exploraziun è qualifitgada la pagina da SvizraMobil davart la ruta 65, la via da velo a l'En. La vischnanca da staziunament Valsot ha realisà il project cun subsidi finanzial dal chantun Grischun. |
|
|
| Il Grischun represchentà prominentamain a la CYCLE WEEK |
| La CYCLE WEEK 2023, il grond eveniment da la Svizra cun velo ha gì lieu la fin da matg en il center da Turitg. 80'000 giasts e passants èn sa chattads al festival participativ da velo il pli grond dal pajais ed han emprendì d'enconuscher l'entir mund da velo en l'alea d'Europa ed en la Brunau. Da la partida al cumenzament da la stagiun da velo e da viandar è stà er il Grischun cun fairtrail. Sco gia l'onn passà han uschenumnads fairdinands repartì en l'alea d'Europa tar la staziun principala da Turitg regalins als visitaders sco per exempel la broschura ed il scalin da fairtrail. En pli ha il Grischun mussà per l'emprima giada il clip il pli nov cun l'ambassadur da fairtrail Nino Schurter, en il qual il profi da velo da muntogna inscuntra sin il trail ina gruppa da lamas. Ina incumbensa prominenta directamain sin la plazza d'Europa han era puspè gì il Bike Kingdom, Tavau/Claustra, San Murezzan, Muster Sedrun e nov la Surselva. |
|
|
| Partenza da success en la Trailtrophy 2023 |
La sfida da cursa da trail che graubünden Trailrun ha creà, l'uschenumnada Trailtrophy, tar la quala i pon vegnir rimnads en tut il chantun Grischun totalmain 37 tschancuns, ha gì ina partenza fulminanta.
Dapi il 1. da zercladur 2023 èn vegnidas rimnadas gia 101 trofeas, currids 1'272 kilometers e surmuntads 69'306 meters autezza (stadi dals 21-06-2023). Da las 72 curriduras e curridurs registrads han gia 33 rimnà almain 1 trofea – ils pli fervents possedan gia 10 trofeas u dapli. Las emprimas trais emnas da la trofea han pudì vegnir entusiasmadas gias pli che dubel tantas curriduras e curridurs per la sfida sco en l'entira perioda l'onn passà. Las trofeas da trail nr. 11 (gir dal Lag la Cauma) e nr. 23 (chavorgia da la Viamala) èn vegnidas absolvidas gia diesch giadas e cun quai il pli savens.
Vesì da la perspectiva dal project furnescha la Trailtrophy experientschas ordvart relevantas per la planisaziun da turas ed il cumportament dals curridurs da trail insumma. |
|
|
| graubünden Bike quinta cun la collavuraziun da tuts |
Nus ans legrain ch'ils emprims pass da la lavur per il project graubünden Bike èn fatgs. Per ina survista dals cuntegns dal project, la structura d'organisaziun e pussaivladads da sa participar activamain recumandain nus da dar in'egliada en nossas infurmaziuns da project cumpactas.
Tut ils partenaris èn cordialmain envidads da far part activamain a la creaziun e l'accumplientscha da las finamiras da project. En quel connex ston ins menziunar ch'il proxim workshop OKR (Objectives and Key Results) vegn ad avair lieu ils 7 da settember 2023 a Cuira.
Infurmaziuns ed invits adina actuals davart nossas occurrenzas survegnis Vus, sche Vus s'annunziais online per ils updates da noss projects. |
|
|
| …ina via da velo na daventa betg ina tala mo, sch'ella po vegnir duvrada segir e confortablamain cun il velo? Ina via da velo ubain ina via da velo e da viandar en il senn da l'urden da signalisaziun svizzer (USS) è signalisada cun ina tavla radunda blaua cun in pictogram da velo resp. in pictogram da velo e da pedun. Insatge che blers na san betg: Nua ch'i dat quels signals, exista ina obligaziun da diever per il traffic da velo. Formulà cuntrari: Nua ch'ina via da velo ubain ina via da velo e da viandar signalisada passa en vicinanza d'ina via, exista automaticamain in scumond da traffic per velos sin quella via. |
|
|
| SvizraMobil cun ina nova cumparsa |
Ins di ch'il matg fetschia tut nov. Ma gia la fin d'avrigl ha SvizraMobil, la rait da traffic betg motorisà svizzer, mess en l'internet sia cumparsa repassada dal tuttafatg. La nova pagina d'internet metta l'element essenzial en il center - numnadamain las rutas uffizialas e signalisadas. Ella correspunda tecnologicamain als standards ils pli novs, fascinescha cun novs cuntegns, ina simpla navigaziun ed ademplescha las pretensiuns da l'accessibilitad senza barrieras.
Tgi che vul en quest'occasiun s'infurmar davart il sistem da SvizraMobil che vegn purtà da la Confederaziun e dals chantuns, po far quai cun ina broschura cumparida nov. Ella è scritta en trais linguas naziunalas e po vegnir chargiada giu da la pagina d'internet da la fundaziun SvizraMobil. |
|
|
| © 2023 Uffizi da construcziun bassa, Servetsch per il traffic betg motorisà. Tut ils dretgs resalvads. |
|
|
