| Sa mussa l’effect da fairtrail en l’analisa da las reclamaziuns? |
La scola auta spezialisada dal Grischun (SAS Grischun) ha rimnà ed evaluà l'indeschavla giada dapi l'onn 2011 reclamaziuns da giasts davart il tema traffic betg motorisà tar organisaziuns da turissem, interpresas da transport ed auters acturs dal turissem da stad grischun. Da beneventar: Schebain ch’igl èn vegnids dumandads bainquant dapli purtaders da prestaziuns che fin ussa, hai dà mo paucas annunzias dapli.
La frequenza relativa dals temas annunziads è restada pli u main eguala: La rait da vias era il pli savens in motiv per sa grittentar, avant la qualitad da la signalisaziun ed avant conflicts cun autras gruppas d’utilisaders. Dapi la culminaziun l’onn 2020 è il dumber d’annunzias en connex cun conflicts d’utilisaders tschessada cuntinuadamain per pli che dus terz! Davent dal 2019 marscha en il Grischun la campagna da fairtrail – in connex è evident, er sch’el na po betg vegnir attestà cun las datas preschentas. L’analisa cumpletta pon ins leger qua. |
|
|
| Il Grischun, in chantun da velos |
| Grischun è velo da muntogna – dentant anc bler dapli! Il program da promoziun Graubünden Bike ha inizià sut la direcziun da l’organisaziun spezialisada Pro Velo Grischun la campagna chantun da velo Grischun. Quella ha cumenzà ad entusiasmar tant la populaziun grischuna sco er las autoritads per l’ir cun velo en tut las situaziuns. Er las cundiziuns generalas necessarias duain vegnir tematisadas. Ta lascha intgantar sin velokanton.ch da tschintg istorgias inspirantas en trais linguas e guarda infurmaziuns da basa detagliadas che mussan, pertge che l’ir cun velo en il mintgadi n’è betg be pratic, mabain po esser inspirant u perfin fascinant. Ti’atgna istorgia, tes giavischs e motivs persunals per ir cun velo èn era dumandads. |
|
|
| Contribuziun dal chantun a SvizraMobil 2024 fin 2027 |
| Tgi ch’è en Svizra per via en la natira d’atgna forza fisica, enconuscha ils mussavias da las rutas da SvizraMobil e na vul pli renunziar a quels. Da stad e d’enviern, en sella, a pe, sin la scarsola u cun skis da passlung. A la regenza grischuna vai gist tuttina. Perquai ha ella decidì da prolungar la collavuraziun cun la fundaziun SvizraMobil per ulteriurs quatter onns. Tut las purschidas en signalisadas en la cuntrada cun ina signalisaziun da rutas speziala. Las infurmaziuns davart las rutas èn concepidas unifurmamain, d’auta qualitad e scrittas en pliras linguas. Sin ina app èn disponiblas tut las rutas e las infurmaziuns vitiers. Ellas servan da basa impurtanta per bleras offertas cudeschablas per far experientschas activas en nossa cuntrada. Er l’ulteriura infrastructura dal traffic turistic betg motorisà vegn uschia valurisada dapli. |
|
|
| Cuntinuaziun dal project Graubünden Trailrun |
| Suenter ch’il svilup dal sport trailrunning ha pudì vegnir finanzià e dirigì ils davos quatter onns sur il project graubünden Trailrun da la NPR, èn dumandadas novas ideas, ussa ch’il project è terminà. La schliaziun è da fundar in atgna uniun. Trailrunning è sa sviluppà grazia al project graubünden Trailrun d’in sport prosperant ad in sport etablì cun ina gronda communitad. Las investiziuns fatgas èn sa pajadas e la collavuraziun suror las destinaziuns e coordinada centralmain vegn stimada fitg dals participants e duai per quai vegnir mantegnida, per pudair garantir la persistenza da las investiziuns. Per quel motiv è l’idea da l’uniun quella da cuntinuar cun la marca graubünden Trailrun, resp. ses secturs parzials, dals manar vinavant e cun quai promover il svilup dal sport trailrunning en il chantun Grischun a lunga vista. Il post d’administraziun manà centralmain pissera vinavant ch’ina strategia unitara chantunala possia vegnir realisada. |
|
|
| Egliada enavos a la dieta davart il traffic betg motorisà |
La dieta davart il traffic betg motorisà ha gì lieu ils 6 d’october en l’aula da la Scola auta spezialisada dal Grischun a Cuira. Claus Caluori, il manader dal post traffic betg motorisà da l’Uffizi da construcziun bassa dal Grischun, ha pudì beneventar var 150 participants interessads da diversas spartas. La dieta da quest onn è vegnida concepida cun il tema principal «Il traffic betg motorisà en la midada». La midada e cun quai il futur dal traffic betg motorisà ha integrà la cussegliera guvernativa Carmelia Maissen en ses referat d’entrada. Il Grischun vegnia a promover il traffic betg motorisà, per che quel possia furmar ina pitga equivalenta en la planisaziun dal traffic. Ils referats sequents han dà invista en divers temas sco la decisiun giudiziala a l’Üetliberg e sia impurtanza per il Grischun, u sco che vias curtas pon esser la schliaziun per la midada da traffic er en chantuns muntagnards. En pli èsi vegnì mussà, sco che la digitalisaziun sustegna il traffic betg motorisà e tge tools novs ch’èn en funcziun. La visiun d’in traffic persistent è vegnida tematisada e sco che quella po vegnir cuntanschida cun il project «E-Bike-City», ed er la realisaziun dal plan sectorial da velo a Tavau. Cumplettà è il program multifar vegnì d’ina discussiun al podi e d’exempels pratics e pitchs da projects.
Ulteriuras infurmaziuns ed impressiuns: https://fachtagung-langsamverkehr.ch |
|
|
| © 2023 Uffizi da construcziun bassa, Traffic betg motorisà. Tut ils dretgs resalvads. |
|
|
