Zercladur 2025 Dieta specifica davart il traffic betg motorisà 2025 – s'annunziar ussa! Ils 6 da november 2025 ha lieu en il Forum Landquart la Dieta specifica davart il traffic betg motorisà da quest onn. Sut il motto «La midad'al velo en il chantun Grischun. È quai pussaivel?» As spetgan referats ed inputs interessants per l'avegnir dal traffic betg motorisà. Contribuziuns tranter auter da la cussegliera guvernativa dr. Carmelia Maissen, da dr. Ursula Wyss, dal UVIAS, da la Viafier retica e d'ulteriuras expertas ed experts da differents secturs procuran per in program varià. La participaziun è gratuita, s'annunziar pon ins fin ils 23 d'october 2025. Annunzia e dapli infurmaziuns: fachtagung-langsamverkehr.ch Lavuratori davart la promoziun dal traffic da velo tar uffants e giuvenils – bun barat ed emprimas mesiras Ils 2 d'avrigl 2025 han var 20 represchentantas e represchentants da vischnancas, da scolas, da l'administraziun, d'uniuns e d'ulteriuras organisaziuns sviluppà ensemen – en il rom d'in lavuratori – ideas per promover il traffic da velo tar uffants e giuvenils. La finamira dal suentermezdi è stada quella d'elavurar strategias e mesiras concretas per concepir l'ir cun velo pli attractiv per ils uffants ed ils giuvenils. En il center dal lavuratori èn stadas las duas vischnancas da pilot Tusaun e Puntraschigna. Il suentermezdi è stà caracterisà da discussiuns captivantas e d'in grond engaschament. En il proxim pass duain ussa vegnir realisadas tschertas mesiras concretas en las duas vischnancas da pilot. Las enconuschientschas respectivas servan sco basa per alura sviluppar vinavant e tractar il tema ensemen cun ulteriuras vischnancas interessadas. Il lavuratori ha mussà, quant grond che l'interess e la prontezza da promover activamain il traffic da velo tar uffants e giuvenils èn – in pass impurtant sin la via vers ina mobilitad persistenta ed orientada vers l'avegnir. Publicaziun dal Premi da promoziun da la Posta 2026 e dal Fond da la Mobigliar «Punts e piogns» Ensemen cun sia partenaria, la Posta svizra, surdattan las Sendas svizras il Premi da promoziun da la Posta 2026. Il premi conceda mintga onn daners da promoziun per projects da sendas da viandar e da nov er da sendas da viandar d'enviern. L'ultim termin d'inoltraziun è ils 31 d'avust 2025: Ulteriuras infurmaziuns ed annunzia Plinavant surdat la Mobigliar – en il rom da ses partenadi cun las Sendas svizras – contribuziuns da promoziun or dal Fond da la Mobigliar «Punts e piogns». Las contribuziuns servan per sanar e per construir punts e piogns sin la rait da vias e sendas da viandar. L'ultim termin d'inoltraziun è ils 31 d'avust 2025: Ulteriuras infurmaziuns ed annunzia Fairtrail Grischun: Ensemen e cun respect sin via Dapi l'onn 2019 promova Fairtrail Grischun ina convivenza cun respect sin las sendas da las muntognas grischunas. La campagna sensibilisescha da prender resguard sin ils conumans, la natira, l'agricultura ed ils animals selvadis. La finamira èsi da mantegnair a lunga vista l'entira rait da sendas e vias dad 11 000 kilometers per tuts – sajan quai viandantas e viandants, ciclistas e ciclists ubain persunas che curran u che fan ina spassegiada. Empè da scumonds sa concentrescha Fairtrail sin la sensibilisaziun, sin inscunters persunals e sin messadis clers sco «Jau ser puspè la saiv, cura ch'jau sun passà tras.» u «Il rument port jau puspè a chasa. Quai è logic!». Fairdinands sensibiliseschan al lieu da prender resguard in sin l'auter, in codex definescha reglas cleras e giweaways fan attent en moda ludica ad in cumportament fair. Il profi da mountainbike Nino Schurter è l'onn 2025 puspè testimonial ed ambassadur da la nova campagna da video. Fairtrail metta uschia accents per ina convivenza cun respect – en il Grischun e sur ils cunfins or. Uschia pudais Vus integrar Fairtrail tar Vus: gr-shop.fairtrail.ch/pages/pm Dapli infurmaziuns davart la campagna (B2C): graubuenden.ch/fairtrail Trais invits da graubünden Bike Graubünden Bike dat schlantsch als projects da velo. Trais exempels mussan, quant vast ch'il velo vegn vivì oz – e nua ch'ins po far experientschas concretas cun il velo questa stad: Las Ciclistas – in moviment da dunnas per dunnas: mintg'emna viadis cun velo ed ina gronda festa finala a Schlarigna. FreiPass – dus ulteriurs pass vegnan serrads durant in di per il traffic d'autos ed averts per ils velos. Mantegnair sendas – novs curs per mantegnidras e mantegniders da sendas garanteschan a lunga vista la qualitad da l'infrastructura da mountainbike. Tut ils termins e dapli infurmaziuns chattais Vus en il chalender da projects sco er sut graubuendenbike.org. Sa participar ussa: Enquista online davart il turissem da velo e da bike en il Grischun Quant cuntenta u cuntent essas Vus cun la purschida da velo e da bike en il Grischun? Tge basegns avais Vus sco persuna che va cun velo / mountainbike? E quants daners dais Vus or, cura che Vus essas en gir? La Scola auta spezialisada dal Grischun fa actualmain in'enquista online davart il turissem da velo e da bike en il Grischun. La finamira è quella da chapir meglier las aspectativas ed il profil da las persunas che van cun velo sco er lur moda e maniera da dar or daners. Las enconuschientschas èn ina basa impurtanta per sviluppar vinavant la purschida – per ch'il Grischun tutgia er en l'avegnir tar las pli attractivas destinaziuns da velo e da bike. Sche Vus essas stads en gir cun il velo u cun il bike en il Grischun l'onn 2024 u 2025, As envidain nus cordialmain da participar a l'enquista. Vus duvrais 10 minutas per respunder las dumondas e pudais gudagnar bels premis: Link a l'enquista Uffizi da construcziun bassa, Traffic betg motorisà Loëstrasse 14, CH-7001 Chur flv@tba.gr.ch  •  Pagina-web © 2025 Uffizi da construcziun bassa, Traffic betg motorisà. Tut ils dretgs resalvads.

In Shared Service da Graubünden Ferien