| Program e puncts culminants da la Dieta specifica davart il traffic betg motorisà 2025 |
| Sut il motto «La midada al velo en il chantun Grischun. È quai pussaivel?» As spetgan referats interessants: |
 |
|
Pled ed update davart la Strategia per il traffic betg motorisà (dr. Carmelia Maissen, cussegliera guvernativa, scheffa dal Departament d'infrastructura, energia e mobilitad) |
|
|
|
Invistas da la realisaziun da la Lescha federala davart las vias ciclablas (Silvio Zala, expert da l'Uffizi federal da vias UVIAS) |
|
|
|
La midada al velo – dals pleds a las ovras (dr. Ursula Wyss, anteriura cussegliera naziunala, Svilup strategic da las citads e mobilitad urbana) |
|
Il program vegn cumplettà cun updates dal Post spezialisà per il traffic betg motorisà e dals projects chantunals graubündenBike, graubündenTrailrun e Fairtrail sco er cun inputs davart ils temas planisaziun dal territori e transport da velos da muntogna cun la Viafier retica. Per variaziun procuran ils referats «Viandants sco influencers – smaladicziun u benedicziun» sco er «Handbike – da barrieras e punts». Natiralmain resta avunda spazi per tgirar contacts. Er per café e per culinarica vegni procurà.
La participaziun a la dieta specifica è gratuita. L'arranschament sa drizza a collavuraturas e collavuraturs d'administraziuns communalas e d'organisaziuns turisticas, a biros da planisaziun, a represchentantas e represchentants da la politica sco er a tut ils ulteriurs furniturs da prestaziuns dal traffic betg motorisà ed a tut tgi che s'interessa per quest tema.
Guardar l'entir program
S'annunziar ussa e sa segirar in plaz! |
|
|
| Cyclomania 2025 cun challenge da velos Cuira e conturn |
Bainbaud èsi uschè lunsch – il 1. da settember 2025 cumenza la challenge naziunala da velos Cyclomania da quest onn. Cun la challenge da velos «Cuira e conturn» è represchentà er il chantun Grischun. Sut l'egida da l'Uffizi da construcziun bassa sco post spezialisà per il traffic betg motorisà sa participeschan las vischnancas da Cuira, Domat, Favugn e Vaz Sut a l'acziun da promoziun da velos. As mettai sin voss velo ed as participai – bels premis spetgan sin Vus!
Annunzia ed infurmaziuns: Cyclomania – Challenge da velos Cuira e conturn |
|
|
| Acziun d'atun 2025 da Bike2school |
Cun l'acziun Bike2school animescha Pro Velo Svizra gia dapi 17 onns las scolaras ed ils scolars d'ir a scola cun il velo. Gia passa 100 000 uffants e giuvenils èn sa participads a l'acziun. Er quest atun pon classas dal chantun Grischun sa participar gratuitamain a la concurrenza. Classas da scola pon anc s'annunziar fin ils 16 d'october 2025.
Annunzia ed infurmaziuns: www.bike2school.ch |
|
|
| Fegl d'infurmaziun davart las novas reglas da traffic per e-bikes |
Dapi il 1. da fanadur 2025 valan novas reglas da traffic che pertutgan principalmain la categoria dals «e-bikes svelts (fin 45 km)». Per che la charrabladad cun e-bikes svelts restia garantida er vinavant, dastgassi en spezial esser necessari d'adattar ils scumonds da traffic da trais parts. Ensemen cun la Polizia chantunala ha il Post spezialisà per il traffic betg motorisà preparà in fegl d'infurmaziun per las vischnancas che mussa, co che la signalisaziun duess vegnir adattada.
Tar il nov fegl d'infurmaziun |
|
|
| Nova publicaziun e webinari: Responsabladad en cas d'accidents sin l'infrastructura per velos da muntogna |
En il rom da la planisaziun e da la permissiun da novs trails e da novas vias da velos da muntogna vegn in tema discutà en moda spezialmain intensiva: Tgi è la culpa, sch'i dat in accident? Savens curseschan faussas infurmaziuns che chaschunan malsegirezza e retegnientscha. Il nov document «Responsabladad en cas d'accidents sin infrastructuras per velos da muntogna» procura per clerezza. El respunda las dumondas las pli impurtantas da tut las persunas ch'èn incaricadas cun la planisaziun, la construcziun u la gestiun d'infrastructuras per velos da muntogna. Ma er proprietarias e proprietaris da bains immobigliars e manaschis forestals ed agriculs survegnan respostas a lur dumondas.
Tar la publicaziun «Responsabladad en cas d'accidents sin l'infrastructura per velos da muntogna»
Ils 9 da settember, da las 10.30 fin las 12.00, maina SvizraMobila tras in webinari e preschenta la nova publicaziun cun mussar experientschas praticas e cun respunder dumondas pertutgant il dretg da responsabladad.
Tar l'annunzia per il webinari |
|
|
| L'emprest da velos «Mooinz» a Cuira festivescha l'emprim anniversari da nextbike cun cifras da record |
Il settember 2023 è il sistem da bikesharing Mooinz vegnì lantschà a Cuira. Ed – accumpagnà d'in pau sceptica – è il sistem vegnì introducì avant in onn cun la nova firma gestiunaria nextbike. En il fratemp è il sistem sa sviluppà ad ina vaira istorgia da success: L'utilisaziun è sa multiplitgada entaifer in onn per il factur 10: il zercladur 2025 èn vegnids dumbrads var 9000 viadis.
Er durant ils mais d'enviern è la dumonda restada stabila, quai ch'è in indicatur per ina vaira midada en il cumportament da mobilitad. En il fratemp è Favugn vegnì collià cun la rait; ulteriuras staziuns a Cuira sco er ulteriurs e-bikes e cargobikes cumpletteschan la purschida. Per Pro Velo Grischun èsi mo ina dumonda dal temp, fin che bleras autras vischnancas en il chantun vesan la plivalur – e siglian sin il velo.
Sut la nova marca «invia BikeShare» duai la rait vegnir extendida vinavant e rendida accessibla per ulteriuras regiuns.
Ulteriuras infurmaziuns: provelogr.ch/mooinz |
|
|
| Gidar a concepir il futur dal trailrunning en il Grischun |
Cun graubündenTrailrun scrivain nus il proxim chapitel, caracterisà d'innovaziun, d'ina concepziun cuminaivla e d'ina stretga colliaziun cun il turissem. Tias ideas e tes engaschament quintan! Prenda part activamain: en il lavuratori Open Space & Trails, sur il pool da project u cun surpigliar agens projects parzials.
Open Space & Trails sco lavuratori per trailrunning en il Grischun: Gievgia, ils 20 da november 2025, discutan represchentantas e represchentants dal turissem, dal sport e da la community en in'atmosfera patgifica davart l'avegnir da questa disciplina da sport. Cumplettà vegn l'inscunter cun in'experientscha da trail cuminaivla. T'annunzia ussa per giudair inspiraziun, barat ed in vair feeling da trail!
Dapli infurmaziuns |
|
|
| Nizzegiar, integrar e promover Fairtrail sin plaun regiunal! |
Fairtrail sensibilisescha per respect sin las sendas da viandar grischunas – envers autras utilisadras ed auters utilisaders da las sendas, ma er envers la natira, l'economia d'alp e l'economia forestala. Nus sustegnain vischnancas e destinaziuns cun ina ferma campagna chantunala da communicaziun, cun ils Fairdinands ed – en collavuraziun cun vus – cun acziuns localas intenziunadas: Quai pon esser discurs cun la community, la preschientscha sin sendas nua ch'i po dar conflicts, l'impediment da bloccadas, acziuns da donaziun u autras mesiras ch'èn concepidas tenor voss basegns. Uschia gidain nus a sensibilisar la glieud directamain al lieu ed a reducir conflicts.
As annunziai en cas d'interess: christa@tu-risch.ch
Dapli infurmaziuns davart Fairtrail e davart vossas pussaivladads
Fotografia: Grischun vacanzas |
|
|
| Dapli vischnancas d'alpinissem en Svizra |
Dapi la stad 2025 tutgan Campo Vallemaggia en il Tessin e Lauenen en il chantun Berna da nov tar la rait alpina. Quests lieus sa mettan en retscha cun las vischnancas d'alpinissem grischunas St. Antönien, Lavin, Guarda ed Ardez sco er la Valle Onsernone en il Tessin. Ensemen s'engaschan ellas per in turissem che s'accorda cun la natira e cun la cultura, che rinforza tranter auter la valurisaziun regiunala e che promova purschidas dal traffic betg motorisà, sco viandar ed ir en muntogna. Patratgs centrals da las vischnancas d'alpinissem èn il viadi ecologic cun il traffic public en la destinaziun sco er ina mobilitad persistenta al lieu. Cun la distincziun s'obligheschan tut las vischnancas d'alpinissem da mantegnair lur cuntrada unica, d'amplifitgar purschidas (da sport da muntogna) persistentas e d'intermediar als giasts ina cultura (muntagnarda) autentica.
Las novas vischnancas svizras d'alpinissem |
|
|
| Tschernì il pli bel lai da muntogna |
Ils lais e flums dal Grischun tutgan tar las particularitads che vegnan numnadas il pli savens en connex cun la metropola natirala da las Alps. Tut en tut ha il chantun alpin 1038 lais. Blers dad els èn cuntanschibels mo a pe u cun il velo da muntogna. A tgi che va a viandar permettan els ina pausa recreativa e – sche necessari – ina sfradentada bainvegnida. En ina votaziun online ha Grischun Vacanzas tschertgà – e chattà questa stad il pli bel lai da muntogna: Tenor ils fans dal Grischun è il Lagh da Saoseo en la Val Puschlav il pli bel lai da muntogna dal Grischun sur 1500 m s.m. Cun 818 vuschs ha el gudagnà mo per pauc la votaziun. Mo gist set vuschs damain hai dà per il Lej da Staz en l'Engiadina sin il segund rang. Sin plazza 3 suonda il Lai da Palpuogna a Bravuogn Filisur.
Tar ils top 10 dals lais da muntogna
Dapli infurmaziuns
Fotografia: Svizra Turissem |
|
|
| © 2025 Uffizi da construcziun bassa, Traffic betg motorisà. Tut ils dretgs resalvads. |
|
|
