| Retrospectiva sin la Dieta spezialisada 2025 & perspectiva 2026 |
La Dieta spezialisada davart il traffic betg motorisà ha gì lieu ils 6 da november 2025 en il Forum Landquart. A la dieta ha l'Uffizi da construcziun bassa dal Grischun, sco Post spezialisà per il traffic betg motorisà, dastgà beneventar var 180 participantas e participants interessads da differentas spartas. Sut il tema principal «La midada al velo en il chantun Grischun. È quai pussaivel?» èn vegnidas discutadas las schanzas e las sfidas d'ina strategia chantunala a favur dal velo. Silvio Zala da l'Uffizi federal da vias (UVIAS) ha declerà il stadi actual da la rait da vias da velo, entant che dr. Ursula Wyss, urbanista ed experta per mobilitad persistenta, ha mussà a maun d'exempels concrets, co ch'i gartegia da realisar la strategia cun success sin plaun chantunal e communal. En il focus è stada spezialmain la visiun d'ina infrastructura da velo segira ed attractiva per tut las persunas – dad 8 fin 80 onns. En la segunda part da la dieta èn suandads exempels pratics ed invistas da projects.
Ulteriuras infurmaziuns, impressiuns sco er ils documents davart ils referats stattan a disposiziun sin la pagina d'internet. La proxima Dieta spezialisada davart il traffic betg motorisà è gia en planisaziun ed ha lieu ils 29 d'october 2026 a Cuira.
fachtagung-langsamverkehr.ch |
|
|
| Strategia per il traffic betg motorisà en il Grischun 2037 |
En il Program da la Regenza 2025–2028 ha la Regenza grischuna er mess in accent sin il traffic betg motorisà. Cun la preschentaziun da la «Strategia per il traffic betg motorisà en il Grischun 2037» è quai ussa vegnì concretisà per l'emprima giada. E la visiun da la strategia è definida cleramain: «Fin l'onn 2037 duai il chantun Grischun esser enconuschent er ordaifer ils cunfins chantunals per sias purschidas attractivas en il traffic betg motorisà», di il president da la Regenza Marcus Caduff, schef dal Departament d'economia publica e fatgs socials. Vias, sendas da viandar e vias da velo da muntogna concepidas en moda attractiva duain envidar la populaziun, las persunas occupadas ed ils giasts da sa mover en moda activa. «Uschia garantin nus a lunga vista in'auta qualitad dal lieu e rinforzain noss chantun sco lieu da viver, lieu economic e territori da recreaziun attractiv.»
La cussegliera guvernativa Carmelia Maissen, scheffa dal Departament d'infrastructura, energia e mobilitad, tutga la noda: «Fin l'onn 2037 è il traffic betg motorisà ina pitga principala centrala da la mobilitad en il chantun Grischun, uschia che la mesadad da tut las vias en il chantun vegn fatga a pe u cun il velo.» Tenor la strategia duai la mobilitad activa en il mintgadi ed en il temp liber sa chapir da sezza e vegnir promovida en moda activa.
Ulteriuras infurmaziuns |
|
|
| Nov agid pratic Rutas da SvizraMobila |
Tge dovri per transfurmar ina via da velos en ina ruta da SvizraMobila? Tge pretensiuns da qualitad valan? E co poss jau adattar ina ruta? Il nov agid pratic resumescha per l'emprima giada tut las basas – davent da las cumpetenzas sur ils criteris da qualitad fin ils termins. Cun l'agid pratic han tut ils partenaris a disposiziun ina basa unitara per planisar, valitar e sviluppar vinavant las rutas.
Qua vai tar l'agid pratic |
|
|
| Sin ils fastizs dal traffic da velos: Cyclomania 2025 è stada in success |
L'acziun da promoziun da velos Cyclomania 2025 è terminada. En il rom da la challenge «Cuira & conturns» han 461 participantas e participants registrà cuminaivlamain – durant il settember 2025 – lur viadis cun velo e cuntanschì ina lunghezza da betg main che 68 000 km. Quai è ina giada e mez enturn il mund! Las vischnancas participadas a la challenge Domat, Favugn, Cuira e Vaz sut san ussa, nua che ciclistas e ciclists èn en gir e pon trair a niz questas datas, per sviluppar lur raits da vias da velo en moda orientada als utilisaders. L'Uffizi da construcziun bassa dal Grischun sco post spezialisà chantunal per il traffic betg motorisà ha coordinà e sustegnì las vischnancas participantas, e vegn a far quai er en connex cun l'ulteriur engrondiment da l'infrastructura da velo. Las participantas ed ils participants han gudagnà differents premis. Dal premi principal, in velo da muntogna electric da CUBE-Store Cuira, po sa legrar Alice Das Neves da Cuira.
Foto da sanestra a dretga: Daniel Huber, CUBE Store Cuira; Alice Das Neves, victura; Kerstin Jerger, Pro Velo Grischun; Christoph Oetiker, schef Traffic betg motorisà Uffizi da construcziun bassa dal Grischun |
|
|
| Fairtrail: Resguard prepara la via |
Fairtrail signifitga resguard, respect ed ina buna convivenza sin las sendas – en l'entira Svizra. In moviment che collia: umans, animals, natira e tuts ch'èn en gir or en il liber. Ensemen – cun vus – promova Fairtrail Grischun ina convivenza cun respect sin las sendas da las muntognas grischunas: en moda faira, prospectiva e cuminaivla. Cun elements visibels sco tavlas, bandierettas u placats obtegna Fairtrail dapli chapientscha en il traffic da temp liber. Sche vus fruntais en vossa vischnanca u en vossa organisaziun sin sfidas en il sectur uman-uman u uman-ambient, as annunziai tar la direcziun dal project da Fairtrail. Els as sustegnan gugent cun ideas e cun soluziuns concretas. Gidai – ad obtegnair dapli resguard e respect sin nossas sendas!
Qua vai tar il formular da contact
Ulteriuras infurmaziuns: fairtrail.ch |
|
|
| Pro Velo: FreiPass entusiasmescha – e va 2026 en la proxima fasa |
En il rom dals events da FreiPass organisads en l'entira Svizra, èn la stad 2025 per l'emprima giada vegnids serrads il Pass dal Lucmagn ed il Pass dal Spleia per il traffic motorisà e dads liber per il traffic activ. Ensemen cun ils events al Pass da l'Alvra sco er al Pass da l'Umbrail han ins pudì giudair en il Grischun tut en tut quatter pass senza traffic. Il project graubünden Bike ha sustegnì l'organisaziun da las duas novas occurrenzas.
La resonanza è stada gronda: Al FreiPass Lucmagn èn sa participadas var 3'000 persunas, al FreiPass Spleia 7'000. Sin lur velos han giuven e vegl giudì l'atmosfera singulara dal pass senza autos. L'entusiassem ed il resun en las medias han suttastritgà la relevanza da quest format. Er turisticamain èn ils effects resortids: Durant la perioda dal FreiPass Lucmagn ha Mustér Sedrun Turissem registrà 13 % pernottaziuns dapli.
Grazia a quest success cumenza FreiPass en il Grischun cun la proxima fasa da svilup. La finamira è quella d'integrar ulteriuras vias da pass. Las regiuns interessadas èn envidadas da sa participar activamain.
Ulteriuras infurmaziuns e contact: graubuenden.ch/de/freipass |
|
|
| © 2025 Uffizi da construcziun bassa, Traffic betg motorisà. Tut ils dretgs resalvads. |
|
|
