Favrer 2026 Fairtrail Grischun: coexistenza funcziunescha Damain conflicts, dapli resguard sin las sendas. L'onn da fairtrail 2025 mussa cleramain: L'utilisaziun communabla da sendas da mountainbike e da viandar funcziunescha en il Grischun per gronda part cun respect e paucs conflicts. Quai demussan l'actuala analisa da reclamaziuns 2025 dal chantun, l'enquista da las utilisadras e dals utilisaders da fairtrail, il debriefing da las destinaziuns sco er ils resuns or dals servetschs da Fairdinand. Fairtrail presta uschia ina contribuziun impurtanta, per che la rait da sendas existenta possia vegnir utilisada vinavant communablamain. Il rapport annual 2025 mussa, tge mesiras ch'èn vegnidas realisadas l'onn passà. Ulteriuras infurmaziuns pertutgant l'onn da fairtrail 2025 Workshops bikecontrol da Swiss Cycling en las scolas dal Grischun Il chantun Grischun sustegna er puspè il 2026 las classas da scola dal Grischun che sa participeschan als workshops inclusivs da bikecontrol da Swiss Cycling. La finamira da bikecontrol èsi da dar a las scolaras ed als scolars tranter 6 e 16 onns (focus scola primara) las abilitads tecnicas ch'i dovra per survegnir dapli segirtad en il traffic sin via e la fin finala d'integrar pli savens il velo en il mintgadi. Bikecontrol è in percurs d'inschign ludic per giuvnas velocipedistas e velocipedists sin ina plazza protegida. Ils curs da 90 minutas han lieu durant il temp da scola obligatoric e vegnan manads d'ina persuna d'instrucziun da bikecontrol. Il 2025 èn vegnids realisads en il Grischun 93 workshops cun 954 participantas e participants. Las classas da scola pon sa participar gratuitamain. S'annunziar per ils workshops da bikecontrol Tge che las sendas tradeschan – novas cifras dal monitoring da las frequenzas Co vegnan las sendas effectivamain duvradas dal traffic betg motorisà? Il monitoring da las frequenzas ibrid da «graubünden Bike» – ina cumbinaziun da posts da dumbraziun e datas anonimisadas da l'app – mussa quant intensiv che las rutas da mountainbike e sendas èn frequentadas en il Grischun. Ils resultats sustegnan las vischnancas e las destinaziuns da planisar e sviluppar vinavant lur rait da sendas sin basa da datas. Las pli novas evaluaziuns mussan tranter auter:   Las rutas da mountainbike signalisadas uffizialmain èn frequentadas bler pli fitg che l'ulteriura rait da sendas da viandar.   Bike-hotspots cun dapli che 50 000 viadis per onn èn repartids en l'entir chantun.   Mesiraziuns regiunalas furneschan infurmaziuns utilas per la coexistenza da pedunas e peduns ed il traffic da velos. Dapli infurmaziuns? Contactescha la direcziun dal project «graubünden Bike». Fotografia: Sam Buchli Record da bikesharing a Cuira: Uschia funcziuna il manaschi en la pratica A tut ils represchentants da vischnanca ed a tut las persunas interessadas: Save the date! Il forum bikesharing svizra e l'Uffizi d'energia e da traffic dal Grischun envidan ils 11 da zercladur 2026 da las 14:00 fin las 18:00 ad ina excursiun a Cuira, incl. apero. L'invit porscha l'occasiun da scuvrir en la pratica, co ch'il manaschi dal sistem da record da bikesharing funcziunescha, e co ch'ins po crear sinergias cun partenaris locals e cun il traffic public! Il program cumplet e las pussaivladads da s'annunziar survegns ti en il proxim newsletter. Ultima schanza per ils curs da mantegnair sendas da «graubünden Bike» Dapi ch'il project «Curs da mantegnair sendas 2023-2026» è vegnì lantschà en il rom da «graubünden Bike», han gia 77 persunas che mantegnan sendas, da 57 vischnancas, profità da la savida spezialisada instruida en la practica. Il resultat: las sendas èn pli durablas, la qualitad pli auta ed ins sto impunder pli pauc per il mantegniment – tuttina sch'igl è sin biketrails explicits, sin sendas utilisadas communablamain u sin sendas mo da viandar. En il focus stattan ina gestiun da l'aua correcta, in trassé optimal e mesiras da construcziun che promovan sistematicamain ina coexistenza da persunas che van a pe e ciclistas e ciclists da muntogna sin la rait da sendas. Ils resuns dals ultims onns da project èn fitg positivs e conferman la gronda plivalur da las scolaziuns. Emprims termins e lieus per l'onn 2026 èn gia publitgads sin la pagina d'internet dal project. Ussa daventar activ: Nizzegia la schanza durant l'ultim onn da project da «graubünden Bike» ed investescha en qualitad, segirtad e coexistenza sin la rait da sendas grischuna. S'annunziar per ils curs da mantegnair trails u colin@tu-risch.ch Bike2school – l'entira classa sin il velo! Cun l'acziun Bike2school animescha Pro Velo Svizra gia dapi 18 onns las scolaras ed ils scolars d'ir a scola cun il velo. Gia 109 000 uffants e giuvenils èn sa participads a l'acziun. Er quest atun pon classas dal chantun Grischun sa participar gratuitamain a la concurrenza. Las classas da scola pon anc s'annunziar fin ils 8 da matg 2026. S'annunziar e survegnir ulteriuras infurmaziuns sut Bike2scool Uffizi da construcziun bassa, Traffic betg motorisà Loëstrasse 14, CH-7001 Chur flv@tba.gr.ch  •  Pagina-web © 2026 Uffizi da construcziun bassa, Traffic betg motorisà. Tut ils dretgs resalvads.

In Shared Service da Graubünden Ferien