| Dumbraziuns dal traffic betg motorisà 2025 |
L'Uffizi da construcziun bassa dal Grischun posseda 25 apparats da dumbraziun per registrar ils moviments da las viandantas e dals viandants sco er da las persunas che van cun velo e cun mountainbike sin tschertas vias. Entant che tscherts apparats èn en funcziun durant l'entir onn, dumbran quels en regiuns turisticas mo durant la stagiun da stad.
Il 2025 èn vegnids endrizzads sis novs lieus da mesiraziun. Malgrà singulas mancanzas da datas pervia da problems tecnics, resta la qualitad da la retschertga tut en tut buna.
Las datas furneschan enconuschientschas impurtantas. Ins po constatar differenzas en il cumportament d'utilisaziun tranter la glieud che va a viandar, la glieud che va cun velo e la glieud che va cun mountainbike. Plinavant datti fluctuaziuns stagiunalas e regiunalas ed er l'aura ha ina influenza.
Questas analisas gidan a meglierar sistematicamain l'infrastructura, a minimar conflicts d'utilisaziun ed a promover optimalmain il traffic betg motorisà en il Grischun.
Link al rapport 2025 |
|
|
| Sis novas rutas per cumenzar la stagiun |
En stretga collavuraziun cun las destinaziuns turisticas dal Grischun ha SvizraMobila lantschà sis novas rutas uffizialas e signalisadas per la stagiun actuala da primavaira / stad. En la regiun Planeiras datti gist trais novas rutas da viandar localas da La Svizra a pe. E cun la senda Prätschli-Carmennahütte vegn averta ad Arosa ina nova senda da viandar senza obstachels. En la regiun Viamala carmalan blers chastels e fortezzas, bels vitgs e cuntradas culturalas da vegnir scuverts cun velo sin la nova ruta da chastels tras la Tumleastga. Ed en la regiun Mesolcina vegnan quellas ciclistas e quels ciclists da mountainbike sin lur custs, che van gugent aval e che vulan explorar ina vallada che viva e ch'è ritga d'istorgia, natira alpina e vitgs tradiziunals.
Ils suandants links envidan gia ussa d'explorar virtualmain las novas rutas: |
|
|
| Annunzia da donns sin sendas da viandar – il tool digital per donns sin sendas |
Centrala per la segirezza e per la qualitad da la rait da vias e sendas da viandar en il Grischun è ina infrastructura fidada.
Cun il tool digital per donns sin sendas ha il public a disposiziun in instrument effizient per annunziar directamain cun il smartphone u PC donns sin sendas da viandar u vid la signalisaziun. Las annunzias registradas, vegnan transmessas directamain a Sendas grischunas, che organisescha uschè svelt sco pussaivel, che la vischnanca da staziunament elimineschia ils donns. La persuna che fa l'annunzia survegn in resun davart il stadi d'elavuraziun. Grazia a questa procedura èsi pussaivel da mantegnair cuntinuadamain la gronda rait da vias e sendas e da rinforzar la responsabladad cuminaivla per la qualitad da la rait.
Link al tool per registrar donns sin sendas:
wegmangel.gr.ch/public |
|
|
| Sa participar a la discussiun davart il traffic da peduns e da velos en la regiun Malögia |
Co duai la glieud che va a pe u cun velo sa mover en l'avegnir en moda segira e confortabla en la regiun Malögia? Per las 12 vischnancas da la regiun vegn actualmain elavurà in concept per il traffic da peduns e da velos.
Mesemna, ils 24 da zercladur 2026, da las 18.00 fin las 21.00, ha lieu en il Rondo a Puntraschigna in workshop public, nua che la glieud indigena ed ils commerziants sco er ulteriuras persunas interessadas pon formular finamiras e giavischs. A las maisas tematicas vegnan discutadas sfidas ed ideas concretas ch'i dat en connex cun il traffic betg motorisà. Las discussiuns vegnan mintgamai moderadas d'ina persuna. Ils resultats vegnan duvrads directamain per sviluppar il concept.
S'annunziar per il workshop public |
|
|
| Excursiun speziala davart la sinergia da bikesharing e traffic public |
Dapi ch'el è vegnì introducì l'onn 2024 è il sistem d'emprestar velos «invia BikeShare» a Cuira creschì rasantamain. Entaifer in pau dapli ch'in onn èn vegnids registrads passa 100 000 viadis. Cun quai è el il sistem che crescha il pli svelt en l'Europa! Ina da las raschuns per quest success è la fitg buna collavuraziun tranter ils differents acturs: l'organisaziun professiunala Pro Velo, las corporaziuns publicas, las interpresas localas e las interpresas da traffic public. Grazia a quests partenadis è la rait daventada en curt temp ina part integrala fixa da la purschida da mobilitad da la regiun.
Il forum Bikesharing prenda quest success sco occasiun ed organisescha gievgia, ils 11 da zercladur 2026, da las 13.30 fin las 17.00, in'excursiun a Cuira.
Link al program ed a l'annunzia |
|
|
| Grond success per il fairtrail kickoff |
La pli impurtanta experientscha dal fairtrail kickoff dals 13 da mars a Tusaun è: Mo ensemen fa fairtrail effect. Destinaziuns, vischnancas, furniturs da prestaziuns, Fairdinands e partenaris dal project lavuran per la medema chaussa – e gist quai è la fermezza da la campagna.
La coexistenza vegn considerada sco ina chaussa natirala en il Grischun. Ina convivenza respectusa resta dentant ina incumbensa permanenta. I dovra vinavant mesiras concretas, clers accents e la collavuraziun.
Per la stagiun 2026 stattan ils suandants temas en il focus: |
 |
|
Sensibilisar e scolar collavuraturas e collavuraturs per il contact cun giasts |
|
|
|
Sviluppar vinavant la communicaziun e tools |
|
|
|
Francar fairtrail en las destinaziuns |
|
|
|
Extender la campagna B2CIls |
|
Ils Fairdinands restan in element central ed èn facturs impurtants per l'effect. Tras els è fairtrail visibel al lieu ed els promovan il dialog cun ils giasts.
Link al rapport cumplet |
|
|
| © 2026 Uffizi da construcziun bassa, Traffic betg motorisà. Tut ils dretgs resalvads. |
|
|
