Uffizi da construcziun bassa, Servetsch per il traffic betg motorisà Avust 2021
 
 
Image
 
  Image
 
Graubünden datti uss er per las ureglias
 
A partir da questa stad pon ins scuvrir il Grischun nov cun in guid da viandar acustic. Cun in audioguid per il telefonin audan viandants en passa 180 puncts tematics lung las sendas e rutas da viandar chaussas interessantas davart la natira e la cultura, l’istorgia e legendas.

Sco emprima regiun turistica en Svizra porscha il Grischun a ses giasts davent la questa stad sin la plattafurma dad Outdooractive curtas infurmaziuns interessantas en furma d’audiodatotecas davart divers temas. L’audioguid è gratuit ed accessibel sur l’app Outdooractive iOS / Android e la website Outdooractive. Tgi ch’elegia in’excursiun specifica vesa, tge puncts tematics ch’èn acusticamain disponibels lung la ruta. Ma er sco inspiraziun èn las audiodatotecas novas fitg adattadas. L’offerta è vegnida elavurada en il rom dal project da promoziun graubündenHike. Ulteriuras infurmaziuns datti tar Grischun Vacanzas.
 
 
 
 
  Image
 
Occurrenza d’infurmaziun davart la signalisaziun da sendas da viandar l’enviern e rutas per ir cun gianellas
 
Suenter la dieta da graubündenMOBIL ils 30 da settember a Cuira, ha lieu a las 17.00 uras in’occurrenza d’infurmaziun davart il tema: signalisaziun da sendas da viandar l’enviern e rutas per ir cun gianellas. Organisada vegn l’occurrenza da Sendas da viandar Svizra (Schweizer Wanderwege).

Bleras destinaziuns han engrondì ils davos onns lur purschida turistica areguard il viandar l’enviern e l’ir cun gianellas. En Grischun datti entant var 85 sendas da viandar l’enviern e rutas per ir cun gianellas. Deplorablamain han ellas per part mancanzas qualitativas. Ina signalisaziun correcta è dentant indispensabla per la segirezza dals turists l’enviern, pervi dal fraid ed ils dis curts. Qua vulessan nus cumenzar ed augmentar persistentamain la qualitad da quellas purschidas ensemen cun ils purtaders da las rutas. L’occurrenza d’infurmaziun sa drizza als responsabels da vischnancas, destinaziuns e telefericas.

Annunzia fin ils 31.8.2021 tar flv@tba.gr.ch.
 
 
 
 
  Image
 
Allegra Academy – savair dapli per nagut
 
L’Allegra Academy porscha buns curs online per tut ils partenaris en Grischun ch’han da far cun il turissem da velos da muntogna ed il traffic betg motorisà: da managers da product a collavuraturs da vischnanca, da collavuraturs d’hotel a manaders da turas, da las autoritads al turissem.

Actualmain èn accessibels quatter differents curs, da fairtrail a la teoria dal mantegniment da vias, da la scolaziun da purschidas a la basa da destinaziuns da mountainbike prosperaivlas. Ed i vegnan tiers cuntinuadamain novs curs. Tut ils curs consistan da pliras lecziuns cun videos, links impurtants, material da lectura e controllas dal progress. Las participantas ed ils participants pon entrar da tut temp e far ils curs en lur agen tempo. E l’Allegra Academy è gratuita. Mo la registraziun persunala è necessaria. Qua pon ins s’annunziar.
 
 
 
 
  Image
 
Dieta GraubündenMOBIL – gia annunzià/annunziada?
 
La dieta d’experts graubündenMOBIL traffic betg motorisà dals 30 da settember 2021 spetga puspè cun in program varià sin Vus. Sajas da la partida sch’i vegn referì, discutà e consultà davart las midadas en il traffic betg motorisà.

Vus udis referats captivants cun inputs davart il traffic betg motorisà. Er preschentan expositurs al lieu soluziuns interessantas. L’event sa drizza a represchentants da las vischnancas e purtaders da prestaziuns turisticas dal Grischun ed è gratuita.Annunzias vegnan acceptadas anc fin ils 13 da settember 2021. Vus As pudais annunziar gist qua!
 
 
 
 
  Image
 
Retschertga davart il temp liber e la selvaschina
 
Sin ina spassegiada, ina tura da velo da muntogna u cun skis: inscunters cun selvaschina èn in eveniment per l’uman, per blers schizunt il motiv d’insumma sa metter en viadi. Il sport al liber e la selvaschina sa chattan perquai en ina interacziun intensiva che vegn anc adina perscrutada. Il parc natiral Beverin intercurescha ensemen cun la scol’auta per scienzas applitgadas a Turitg ZHAW las consequenzas d’activitads da temp liber en la natira per la selvaschina. Dumandadas èn las experientschas persunalas da sportists d’ordadora davart quel tema. Quellas pon vegnir inoltradas sur ina retschertga online. Ils resultats da la retschertga furman la basa per la promoziun pratica d’in turissem da traffic betg motorisà che sa cumporta cun la natira.
 
 
 
 
  Image
 
Il cumportament correct sin las sendas da viandar en vista a muaglia
 
En il passà hai dà incidents cun muvel gross e terzas persunas. Per minimisar la ristga d’in conflict ston tut ils participants cooperar. Ils cultivaders da las alps prendan diversas mesiras en quel connex. Arments tegnan nettas las alps grischunas ch’èn a medem mument regiuns da recreaziun. Tant pli impurtanta è la cultivaziun armonica davart da l’agricultura ed il turissem.

Sche Vus drizzais la communicaziun interna ed externa vers il tema muaglia e sendas da viandar, contribuis Vus considerablamain a quella finamira: Infurmai Voss giasts, co sa deportar correctamain en vista a muaglia ! Tegnai avertas las ureglias per reclamaziuns e renviai quellas als cultivaders d’alps pertutgads! Il fegl d’infurmaziun davart muaglia e sendas da viandar as sustegna latiers. L’agricultura è fitg engraziaivla per Vossa contribuziun ad ina convivenza persistenta da l’economia alpestra ed il turissem.
 
 
 
 
  Image
 
Fairtrail Graubünden: Nino Schurter – episoda 2
 
Entaifer la seria da video cun Nino Schurter è il profi da velo da muntogna ed ambassadur da «Fairtrail Graubünden» en gir sco curridur – ed entaupa per via glieud cun velos da muntogna electronics. Ses motto sch’el va cun velo sin ils trails da sia patria è: «Cun respect vai simplamain meglier.»
 
 
 
 
  Image
 
#trailtreff – ina iniziativa da graubündenTrailrun
 
Far ina cursa ensemen empe da sulet è bain meglier. Perquai datti nov ils uschenumnads #trailtreffs – gruppas da curridurs publicas, nuncumplitgadas, lantschadas da curridurs da trail per curridurs da trail. Igl è tuttina, sch’ins è curridur trenà u noviz, indigen u giast da vacanzas, sch’ins trenescha regularmain en gruppa u mo ina giada, mintgin e mintgina è cordialmain bainvegnida en il #trailtreff ed en la communitad grischuna da curridurs da trail. Tut las infurmaziuns e la survista actuala da #trailtreff datti sin la pagina d’internet www.trailtreff.ch.

Per pudair cuntanscher la finamira d’ina rait da #trailtreffs per l’entir territori è il sustegn dals purtaders da prestaziuns turisticas necessari – cun intermediar ulteriuras curriduras ed ulteriurs curridurs u novas gruppas che vulan far part da l’iniziativa e cun publitgar la purschida nova en Vossa communicaziun. Grazia fitg per Voss sustegn!
 
 
 
 
  Image
 
Promoziun da las vias da viandar
 
Las Sendas da viandar Svizra concedan ensemen cun lur partenaria, la posta svizra, la primavaira 2022 per la tschintgavla giada il premi da promoziun da la posta. Cun quella distincziun vegnan premiads surtut projects da sendas da viandar attractivs per famiglias che dovran anc agid finanzial. Ils projects inoltrads sa chattan il matg 2022 en ina emprima fasa da construcziun e ston esser realisads e transibels il zercladur 2023.

En il rom da ses partenadi surdat la Mobiliar ensemen cun las Sendas da viandar Svizra contribuziuns da promoziun or dal Mobiliar Fonds Brücken & Stege 2022. Las contribuziuns gidan a sanar e construir punts e passarellas sin la rait da sendas da viandar. Ils projects da construcziun inoltrads vegnan realisads en il decurs da l’onn 2022.

Termin final da spediziun per las annunzias è ils 15 da settember 2021.

Ulteriuras infurmaziuns datti sin la pagina d’internet Schweizer Wanderwege.
 
 
 
 
  Image
 
Links tar temas vinavant actuals
 
Contribuziun a las staziuns per chargiar e-bikes: fegl d'infurmaziun, dumonda da contribuziun

Fegl d’infurmaziun porteglias: manual per il traffic betg motorisà

Material da Fairtrail per purtaders da prestaziuns turisticas e vischnancas en il Grischun: regalins, bandierettas d'avertiment, tavlas da respect

Artitgels da Fairtrail per fans: t-shirts, chapitschas, beanies, scalins

Enquista cun schanzas da gudagnar: Co percepeschan ils giasts nossa campagna da fairness?
 
 
 
 
 
Uffizi da construcziun bassa, Servetsch per il traffic betg motorisà
Grabenstrasse 30, CH-7000 Chur  |  Tel. +41 (0)81 257 37 12
flv@tba.gr.ch  |  Pagina-web  |  Impressum
 
© 2021, Uffizi da construcziun bassa, Servetsch per il traffic betg motorisà. Tut ils dretgs resalvads.
 
 
Ein Shared Service von Graubünden Ferien