Uffizi da construcziun bassa, Servetsch per il traffic betg motorisà Avrigl 2022
 
 
Image
 
  Image
 
Grond engaschament dal chantun per il traffic da velo quotidian
 
La regenza è persvadida ch’il traffic da velo quotidian stoppia vegnir promovì sco alternativa ecologica al traffic individual motorisà. Cun il plan sectorial velo dal fanadur 2019 ha il chantun fixà ina basa impurtanta per quai, numnadamain la «rait da velo chantunala», en detagl ed er reglà il sustegn finanzial a las vischancas per cumplettar las parts insuffizientas. Las experientschas dals davos onns mussan displaschaivlamain che la reparaziun dals var 300 puncts debels progredescha mo plaunet. La regenza ha perquai decidì ch’il chantun surpiglia la responsabladad per la planisaziun da la rait da velo chantunala traffic quotidian en collavuraziun e tenor cunvegna cun las vischnancas. En pli vegnan fixadas las contribuziuns per projectar e construir la rait da basa velo al maximum dad 80% e quellas da la rait cumplettanta a 50%. Cun quai dat il chantun in segn cler a favur da la promoziun dal traffic da velo quotidian. Il plan sectorial velo vegn repassà actualmain en quel senn.
 
 
 
 
  Image
 
Fairtrail sa prepara per la stagiun 2022
 
La retschertga da l’onn passà cun bundant 500 participants mussa che fairtrail chatta fitg bun’accoglientscha tar ils giasts ed ils furniturs da servetsch: 95% chattan che la campagna sia ina buna chaussa, er ils fairdinands vegnan taxads fitg positiv cun 85%. Ils meds da communicaziun applitgads per noss messadi sco regalins (give-aways), social media ed acziuns da placat vegnan considerads tuts sco nizzaivels. Motivads correspundentamain vulain nus far reclama er durant la stad 2022 per ina convivenza faira ed agreabla sin nossas sendas da viandar e noss trails.

Ils regalins bainvesids èn vegnids cumplettads e pon vegnir empustads qua dals funiturs da servetschs grischuns. Nov datti sets d’implaster gidaivels e per la gastronomia sets da maisa, tranter auter er in per uffants per picturar. Duvrai en il contact cun voss giasts e clients ils regalins sco purtaders da noss messadi da fairtrail. Menziunai la situaziun extraordinaria e speziala d’in ensemen paschaivel tar nus en Grischun. Noss documents digitals as sustegnan.

En l’avegnir pon er persunas privatas retrair divers artitgels da fairtrail en la butia d’internet da la box stampada Cuira. Faschai attents voss giasts al spurtegl u sin vossa pagina d’internet a quella pussaivladad.
 
 
 
 
  Image
 
bike2school cumenza bainbaud puspè
 
L’acziun participativa bike2school da Pro Velo Svizra ha la finamira d’interessar uffants e giuvenils en moda nuncumplitgada per l’ir cun velo. Ensemen cun lur classa èn els dumandads da far la via da scola durant quatter emnas il pli savens pussaivel cun il velo. Latiers vegnan promovids er il moviment, il spiert da gruppa e la cumpetenza da traffic.

2021 èn sa participads en Svizra 31% dapli uffants e giuvenils che l’onn da record 2019! En il chantun Grischun datti dentant tuttina anc spazi vers ensi concernent las scolas che fan part. Quest onn vegn fatga l’acziun anc pli attractiva cun ulteriuras sfidas e cun ina registraziun digitala individuala dals dis da velo. Il chantun Grischun surpiglia ils custs da participaziun da las scolas. Co ch’i funcziuna, pertge ch’i renda da sa participar e co che l’acziun reussescha pon ins leger sin la pagina d’internet.

Ulteriuras infurmaziuns curtas dal post spezialisà per il traffic betg motorisà:
– Curs da signalisaziun viandar, velo e velo da muntogna: venderdi, ils 13 da matg 2022,
Center da protecziun civila Meiersboden a Cuira, tutta di. Realisaziun : Sendas da
viandar Grischun. Detagls ed annunzia tar Sendas da viandar Grischun.
– Il manual da graubündenHike cun ils resultats dal project da promoziun en scrit è ussa
disponibel online.
 
 
 
 
  Image
 
Er chauns da protecziun e vatgas-mamma han caracter
 
Tgi che frequenta sendas da viandar – a pe u cun velo – vegn confruntà pli e pli cun sfidas ch’eran fin avant pauc anc strusch in tema. Per exempel en cas d’inscunters cun muaglia che vegn protegida cun chauns da protecziun d’attatgas d’animals da rapina gronds u cun vatgas-mamma.

Chauns da protecziun tgiran lur scossa, vatgas-mamma protegian lur vadels. Els fan quai causa lur instinct da protecziun natiral. Ad umans pon tals inscunters far tema, els pon dentant er implitgar ristgas. Quellas pon vegnir minimadas u perfin impedidas cun sa depurtar correctamain.

En il curs pratic da Sendas da viandar Grischun e Plantahof survegns ti la savida da basa impurtanta davart il caracter ed il depurtament tant da chauns da protecziun sco er da vatgas-mamma. Ti emprendast là d’emprim maun, tge reglas fundamentalas che ston vegnir resguardadas tar inscunters cun la muaglia e co ch’incaps malempernaivels pon vegnir impedids en moda effectiva.
 
 
 
 
  Image
 
graubünden Trailrun – il segund onn da project en il rapport annual 2021
 
Ina finamira dal segund onn dal project NPR (nova politica regiunala) graubünden Trailrun era da rinforzar ed engrondir la cuminanza dal trailrunning. Per render accessibel il project graubünden Trailrun ad ina gronda publicitad, è il rapport annual 2021 vegnì realisà per l’emprima giada en furma digitala. Quella realisaziun confurma al temp pussibilitescha al lectur da s’infurmar davart ils pass parzials dal project ch’èn relevants per el, senza stuair tschertgar extendidamain en in vast document. En pli pon links a la pagina d’internet dal project, documents ed er maletgs e videos vegnir integrads en moda simpla.
 
 
 
 
  Image
 
Cifras da vendita da velos ed e-bikes retegnidas da corona
 
Il martgà svizzer da velos ha pers dinamica l’onn passà, mettain causa corona. En cumparegliaziun cun l’onn da record 2020 è il martgà sa diminuì 2021 per 1,5% areguard il dumber da tocs singuls – dal tuttafatg a donn e cust dal velo che dovra mo la forza da musculs. Tar ils velos electrics perencunter ha il martgà pudì crescher anc ina giada per 9,4% ad in nov record da 187'000 tocs.

Entaifer las differentas gruppas da products constat’ins transferiments interessants. Tar ils velos dat en egl il grond interess per velos d’uffants e giuvenils. Tar ils velos electrics èsi la midada dal E-MTB ed E-Citybike al E-SUV-Bike resp. bzw. Crossover E-Bike – ch’ins po observar er tar ils autos. E-SUV-Bikes èn velos electrics cun pennas a duas rodas u cun pennas davant e cun in equipament cumplet da velo da citad (incl. paralozzas e portabagaschas) e rodas voluminusas cun pneus da 28 poleschs, che cuntanschan uschia 29 poleschs). Quai mussa che las cumpradras ed ils cumpraders tegnan avertas tut las opziuns cun cumprar in nov velo electric. Il viadi cumadaivel tras citad per far las cumissiuns da mintga di, filar senza quitads sur vias champestras u er in sprint rasant sin trails en il terren. Schlantsch survegn er il velo electric 45 che vegn duvrà gugent da pendularis. Là importa l’augment 16,6%. Er la categoria E-Road 25 vegn plaunet en moviment , ins ha vendì tschintg giadas dapli velos.
 
 
 
 
 
Uffizi da construcziun bassa, Servetsch per il traffic betg motorisà
Grabenstrasse 30, CH-7000 Chur  |  Tel. +41 (0)81 257 37 12
flv@tba.gr.ch  |  Pagina-web  |  Impressum
 
© 2022, Uffizi da construcziun bassa, Servetsch per il traffic betg motorisà. Tut ils dretgs resalvads.
 
 
Ein Shared Service von Graubünden Ferien