Uffizi da construcziun bassa, Servetsch per il traffic betg motorisà Matg 2022
 
 
Image
 
  Image
 
Cun Fairtrail Graubünden en la nova stagiun d’ir cun velo e viandar
 
Il Grischun ha avert la stagiun d'ir cun velo 2022 a chaschun da l'uschenumnada Cycle Week a Turitg. Sco premiera è vegnida preschentada a l'expo da velo naziunala da venderdi, ils 13 da matg 2022, la nova campagna da Fairtrail cun Nino Schurter. Il campiun mundial grischun da velo da muntogna e campiun olimpic stat er quest on en il center da la campagna Fairtrail Graubünden. Sco ambassadur da Fairtrail al ves'ins en plirs clips che propagheschan respect e toleranza sin sendas da viandar e sin trails. Sco premiera han ins preschentà a la Cycle Week extracts d'ina reportascha da video, en la quala Schurter sustegna ils Fairdinands en lur lavur. Ils Fairdinands, ils rangers da Fairtrail grischuns, èn stads la davosa stagiun en viadi durant 33 dis ed han discurrì cun var 1000 persunas tar inscunters spontans sin sendas da viandar e sin trails.

Link a la reportascha da video cun Nino Schurter
Ulteriuras infurmaziuns davart Fairtrail Graubünden
 
 
 
 
  Image
 
Via bloccada? Annunziar per plaschair!
 
Tgi che sto turnar senza vulair amez ina spassegiada ubain ina tura da velo, perquai che la via è bloccada, sa grittenta – chapiblamain. Talas situaziuns pon vegnir evitadas facilmain. Bloccadas annunziadas che cuzzan in’emna u dapli pon vegnir inditgadas nuncumplitgadamain sin las cartas da swisstopo e SchweizMobil. Ina vischnanca che sto bloccar u sviar temporarmain in senda da viandar u ina via da velo signalisada, po communitgar quai cun pauca fadia ad in vast public. Sche sendas u rutas da viandar èn pertutgadas, ston ins annunziar quai cun in formular da registraziun a Wanderwege Graubünden. Per las rutas da velo u mountainbike è responsabel il post spezialisà per il traffic betg motorisà (Fachstelle Langsamverkehr). L’avis sto cuntegnair ina carta da la via bloccada e dal sviament, ina motivaziun sco er la data dal cumenzament e da la fin probabla da la bloccada.
 
 
 
 
  Image
 
Bike to work per la 13avla giada!
 
Quest onn ha lieu gia per la tredeschavla giada l’acziun participativa bike to work. Durant in mais è la populaziun che lavura clamada d’ir cun velo a la lavur, da promover cun quai il spiert da gruppa entaifer il manaschi, sa muventar dapli en l’aria frestga e proteger a medem temp il clima. Manaschis pon s’annunziar tar l’organisatura Pro Velo Svizra sur la pagina d’internet Projektwebsite, ed ils collavuraturs furman suenter squadras da quatter persunas. La lunghezza da la via da lavur na gioga nagina rolla, i po far part er in/a pedun/a da la gruppa, e tgi che lavura en il biro a chasa po quintar er turas da suenterlavur. Tgi ch’ha duvrà il velo en almain 50% da ses dis da lavur individuals, prenda part a la tratga da premis per singuls e per squadras. L’administraziun chantunala n’ha manchentà anc nagin’acziun fin ussa e sa participescha puspè cun var tschient squadras. Sa participar a l’acziun pon ins mintgamai il matg u zercladur.
 
 
 
 
  Image
 
Novs curs da perfecziunament a l’Allegra Academy
 
L’Allegra Academy porscha a tut ils purtaders da servetsch en Grischun la pussaivladad da sa perfecziunar online gratuitamain davart il tema turissem da mountainbike e traffic betg motorisà. Cun ils curs «Angebotsschulung 02» e «Fairtrail 02» vegnan ussa er offerts dus curs da perfecziunament sin la plattafurma. L’emprim curs tracta l’offerta specifica da velo entaifer las differentas destinaziuns en Grischun e las staziuns per chargiar ils velos electrics. Quel curs è fitg interessant cunzunt per tut quels ch’han in contact direct cun ils giasts. Tar il curs «Fairtrail 02» sa tracti d’ina vart da la scolaziun dals Fairdinands e lura d’emprender d’enconuscher pli bain la campagna da communicaziun «Fairtrail». Tuts dus curs porschan infurmaziuns nizzaivlas e links per chapir pli bain ils basegns dal giast da stad e per esser pinà en quel sectur.
 
 
 
 
  Image
 
Resultats interessants da la dumbraziun dal traffic betg motorisà 2021
 
L’Uffizi da construcziun bassa aveva 2021 dudesch apparats da dumbrar automatics en acziun. Ils apparats èn buns da differenziar ils viandants dals velocipedists e da registrar mintgamai en tge direcziun ch’els van. Duvradas vegnan tecnicas d’infracotschen e d’inducziun. Las periodas entaifer las differentas staziuns da dumbraziun registradas effectivamain divergeschan per part considerablamain. Staziuns da dumbraziun ch’observan il traffic da mintga di funcziunan l’entir onn, p.ex. la staziun da mesiraziun sper la via da velo che maina da la staziun da Landquart a la rundella tar l’access a l’A13. Perencunter èn staziuns da dumbraziun che registreschan las frequenzas dal traffic turistic betg motorisà, pia viandants e ciclists (exempel survart), natiralmain en funcziun mo durant la stagiun da stad. Prender invista en l’evaluaziun dals dudesch dumbraders pon ins qua.
 
 
 
 
 
Uffizi da construcziun bassa, Servetsch per il traffic betg motorisà
Grabenstrasse 30, CH-7001 Chur  |  Tel. +41 (0)81 257 37 12
flv@tba.gr.ch  |  Pagina-web  |  Impressum
 
© 2022, Uffizi da construcziun bassa, Servetsch per il traffic betg motorisà. Tut ils dretgs resalvads.
 
 
Ein Shared Service von Graubünden Ferien