Uffizi da construcziun bassa, Servetsch per il traffic betg motorisà Fanadur 2022
 
 
Image
 
  Image
 
Dieta da graubünden Mobil davart il traffic betg motorisà 2022
 
Ils 4 d’october ha lieu a Cuira la dieta annuala davart il traffic betg motorisà 2022. Il program da la dieta porscha ina maschaida variada da temas dal sectur da temp liber/turissem e da la mobilitad urbana. Il meglier gist annunziar qua! La participaziun a l’occurrenza è gratuita, ella sa drizza a represchentantas /represchentants da las vischnancas ed a furniturs da servetschs turistics en il chantun Grischun. E natiralmain resta bler temp per stabilir ina rait persunala.
 
 
 
 
  Image
 
Dus campiuns olimpics sin il fairtrail
 
Il campiun mundial ed olimpic grischun Nino Schurter è er questa stagiun en il center da la campagna Fairtrail Graubünden. En il davos video da la campagna entaupa el il campiun olimpic Nevin Galmarini e sia famiglia. Svelt èsi evident: Er sin sendas stretgas pon ins passar bain in l’auter cun prender resguard vicendaivlamain, n’emporta betg, sch’ins è en viadi cun velo u a pe. Fairtrail stat per ina convivenza paschaivla sin tut las sendas ed ils trails en Grischun. Sco ambassadur e testimonial da fairtrail dat Nino Schurter ina fatscha a la campagna da sensibilisaziun. La cooperaziun cun Grischun vacanzas ha cumenzà 2021.
 
 
 
 
  Image
 
Sustegn per projects da sendas da viandar
 
L’organisaziun naziunala Sendas svizras offra ensemen cun ses partenaris blers daners da promoziun per projects en connex cun sendas da viandar. I pon vegnir inoltrads projects per duas differentas concurrenzas. Il premi da promoziun da la posta 2023 (Post-Förderpreis 2023) undrescha plans per sendas spezialmain adattadas per famiglias. Fin ils 31 d’avust 2022 pon vegnir inoltrads projects che duain vegnir realisads a partir dal 2023 e fin 2024.

Punts e passarellas vegnan sustegnidas dapi 2019 cun contribuziuns annualas dal fond da la Mobiliar per punts e passarellas (Mobiliar-Fonds Brücken und Stege). Reparaturas, construcziuns novas e construcziuns remplazzantas che vegnan realisadas en il decurs da l’onn 2023 pon er vegnir annunziadas per in sustegniment fin ils 31 d’avust tar Sendas svizras.
 
 
 
 
  Image
 
graubünden Trailrun: Trail-Trilogie
 
1. Let’s Trail – Simplamain partir.
graubünden Trailrun lantschescha en collavuraziun cun Jasmin e Guy Nunige e cun Roberto Rivola in nov format per curs da fufragnar davart il trailrunning. La finamira dals curs èsi da mussar als participants, quant diversifitgà che trailrunning vegn considerà e quant svelt ch’ins daventa in curridur da trail. Gia tar 9 posts vegnan offerts curs da «Let’s Trail». Ulteriuras infurmaziuns sut letstrail.ch.

2. Trailtreff – Fa part er ti.
Parter la passiun rescuverta trailrunning cun glieud da la medem’idea è pussaivel dal tuttafatg nuncumplitgadamain cun ils inscunters da trail emnils: chattar in trailtreff e prender part!

3. Trailtrophy – Experimentar dapli.
Ina sfida tut speziala per tut ils curridurs da trail è l’uschenumnada «Trailtrophy» cun 15 trajects selecziunads en tut il Grischun. Tar quella sfida online na vai betg per il meglier temp, mabain per aventuras da trail, tar las qualas ins po experimentar cuntinuadamain la gronda diversitad dals trails en noss chantun. Far part gratuitamain sut: trailtrophy.ch.
 
 
 
 
  Image
 
Via Grischuna – trail cudeschabel da pliras etappas
 
La Via Grischuna, che collia las duas destinaziuns Tavau e San Murezzan en 7 etappas è naschida sin iniziativa dal fotograf professiunal Dan Patitucci. Sin ils 165 kilometers e 9'000 meters d’autezza spetgan trails variads sin curriduras e curridurs, trails che mainan sperasvi a plirs lais da muntogna ed hotels che beneventan persunas che curran. Las pretensiuns da las singulas etappas pon vegnir dumagnadas bain er da sportists populars trenads.

La Via Grischuna è in bun exempel, co ch’il project graubünden Trailrun funcziuna. In’idea purtada d’utrò a la direcziun dal project è vegnida recepida e realisada da quella. Grazia ad in grond engaschament dals managers/las manageras da product ha pudì vegnir garantida la finanziaziun ensemen cun graubünden Trailrun e realisada ina cursa d’emprova cun far fotografias. En pli han ins chattà cun il sustegn da las destinaziuns in operatur dal tur. Sur eurotrek pon ins reservar il tur.
 
 
 
 
  Image
 
Segund congress da graubünden Trailrun: ils 12 e 13 d’avust 2022
 
Puspè avant il Madrisa Trail ha lieu quest on a Claustra il 2. congress da graubünden Trailrun en in nov format. Tge è la plivalur d’events da trailrun per las destinaziuns, co coopereschan quellas il meglier cun ils organisaturs e co guardan ora il events da sport dal futur? Quellas dumondas discutan experts/expertas il venderdi avantmezdi ed els pudessan mussar cun quai perspectivas interessantas betg be per represchentantas/represchentants ed organisaturas/organisaturs da turissem. Il suentermezdi han curriduras/curridurs activs e las participantas/ils participants dal Madrisa Trail la pussaivladad da sa preparar e metter à jour en workshops davart la planisaziun dal trenament, in nutriment da sport fatg en chasa ed il trenament da stabilisaziun Antara. La sonda avantmezdi vegn cumbinà il congress cun il giubileum dad «800 Jahre Klosters» ed i vegn mussà cun in’occurrenza publica che currer era da grond’impurtanza gia durant il temp dals Gualsers. La participaziun è gratuita, qua vai tar l’annunzia.
 
 
 
 
  Image
 
Co tract jau reclamaziuns a moda constructiva?
 
Il nov curs da l’Allegra Academy s’occupa dal tractament da reclamaziuns da giasts. Cunzunt per tut las collavuraturas/ils collavuraturs ch’han in contact direct cun giasts è quai in curs fitg gidaivel. Sper blers links tar formulars, material d’infurmaziun e posts da consultaziun vegnan er preschentads tips pratics, co sa depurtar en l’interacziun cun ils giasts. Qua vai directamain tar il curs «Reklamationen 01».

Per che la qualitad da la recreaziun d’utilisadras/utilisaders possia vegnir meglierada vinavant, porscha l’Allegra Academy ina plattafurma d’instrucziun online per tut las partenarias/ils partenaris en Grischun ch’han da far cun il turissem da velo da muntogna ed il traffic betg motorisà. Ils curs èn gratuits per tut las furnituras/ils furniturs da servetschs en Grischun, i vegn mo dumandada ina registraziun sin la pagina.
 
 
 
 
 
Uffizi da construcziun bassa, Servetsch per il traffic betg motorisà
Grabenstrasse 30, CH-7001 Chur  |  Tel. +41 (0)81 257 37 12
flv@tba.gr.ch  |  Pagina-web  |  Impressum
 
© 2022, Uffizi da construcziun bassa, Servetsch per il traffic betg motorisà. Tut ils dretgs resalvads.
 
 
Ein Shared Service von Graubünden Ferien