Uffizi da construcziun bassa, Servetsch per il traffic betg motorisà Settember 2022
 
 
Image
 
  Image
 
Dieta da graubünden Mobil davart il traffic betg motorisà 2022
 
Ils 4 d’october 2022 ha lieu la dieta davart il traffic betg motorisà en l’auditori da la Banca Chantunala Grischuna (BCG) a Cuira. Il tema principal è quest onn l’avegnir dal traffic betg motorisà en il territori urban.ed en il sectur da temp liber. Referats captivants, intervistas e discurs al podi furman il program varià. Durant il ritg lunch en pe datti dentant er temp avunda per tgirar la rait persunala cun pliras represchentantas e represchentants dal chantun. La participaziun a l’occurrenza è gratuita, ella sa drizza a las persunas spezialisadas interessadas da las vischnancas ed als furniturs da servetschs turistics dal chantun Grischun. Annunziar ussa: annunzia online. Tut las infurmaziuns davart la dieta da quest onn e revistas fotograficas da la dieta 2021 chattais Vus er sut fachtagung-langsamverkehr.ch.
 
 
 
 
  Image
 
hikeo.ch – viandar e vegnir a savair dapli al lieu!
 
En la rait svizra da sendas da viandar na cuntegnan betg tut ils mussavias ina indicaziun dal temp – talas èn avant maun mo als puncts da partenza, tar finamiras intermediaras e bifurcaziuns relevantas. Tgi che vul avair tranteren dapli detagls, survegn sur ses smartphone dapertut là, nua chi dat in mussavia da la nova app online hikeo.ch indicaziuns dal temp da viandar tar tut las finamiras inditgadas. En pli è ina carta da la regiun disponibla ed i dat links davart l’urari a las proximas fermativas dal traffic public.
 
 
 
 
  Image
 
Fairtrail dal punct da vista d’in uffant
 
Uffants èn ils ambassadurs da fairtrail da damaun. Plain fantasia, cun stritgs energics ed en tuttas colurs malegian noss giasts ils pli giuvens, co ch’els vesan la convivenza sin sendas e trails. Senza stgisa mettan els sin palpiri il messadi principal da fairtrail: plain umor, adina amiaivel e cun in surrir en fatscha, cun grond plaschair dals inscunters, e sur tut splendura in sulai dad aur. Ina selecziun dals dissegns ils pli bels da nossas concurrenzas da fairtrail 2021 e 2022 chattais Vus qua.
 
 
 
 
  Image
 
Bike2school vegn anc pli simpel
 
A partir dal cumenzament dal nov onn da scola pon scolaras e scolars prender part tenor libra tscherna a Bike2school cun il diari da velo. Els creeschan in agen profil online e registreschan ed administreschan sezs lur kilometers e lur puncts. En pli vesan els en lur profil da tut temp, nua ch’els sa chattan en cumparegliaziun cun ils auters participants.

I funcziuna suandantamain: Ir durant quatter emnas a scola cun il velo, rimnar kilometers ed ulteriurs puncts cun acziuns accumpagnantas e gudagnar blers bels premis per in singul, da gruppa u da joker ubain il premi spezial da kilometers: segiurns en la jugi e dis da sport d’enviern per l’entira classa, in velo, chapellinas u ina chascha da ballape.

Bike2school cuvra per quai cumpetenzas en differents moduls dal plan d’instrucziun 21, tras tut ils ciclus. Passa 60 classas en tut la Svizra èn gia prontas per partir – gidai en Vossa vischnanca ch’i vegnan vitiers er anc classas dal Grischun! Fin d’annunzia per l’acziun d’atun è ils 20 d’october 2022.
 
 
 
 
  Image
 
Discussiuns plain tensiun al congress da graubünden Trailrun a Claustra
 
En il center dal 2nd congress da graubünden Trailrun ch’ha gì lieu ils 12 d’avust 2022 a Claustra avant il Madrisa Trail è stada la dumonda, tge impurtanza ch’events da trailrunning han per las destinaziuns ed il turissem e co ch’ils formats vesan (duessan vesair) or en avegnir.

D’accord eran ils expert preschents da la regiun tetgala davart l’impurtanza da tals eveniments, tant per la destinaziun sco indicatur che renda attent a purschidas novas u existentas dal trailrunning sco er per la creaziun da valurs turisticas.

Cuntradictorica ed averta è la discussiun dentant restada areguard ils formats futurs d’events da trailrunning. Ina lavur da master fatga per incumbensa da graubünden Trailrun ha mussà ch’il format futur per events cumpiglia in di, sa restrenscha ad ina disciplina, na dovra nagin program accumpagnant, maina sur la distanza d’in semimaraton che vegn absolvida d’ina persuna suletta e concludida cun ina mesiraziun dal temp ed ina rangaziun.

En las discussiuns la podi cun organisaturs e participants perencunter è sa furmà il giavisch da novs formats da gruppa (p.ex. staffettas) e d’events da plirs dis cun in program accumpagnant attractiv che cuntegnan er distanzas curtas per principiants. D’accord er’ins dentant en in punct: I dovra ina passiun evidenta e vivida dals organisaturs per ch’events da trailrunning hajan success.
 
 
 
 
 
Uffizi da construcziun bassa, Servetsch per il traffic betg motorisà
Grabenstrasse 30, CH-7001 Chur  |  Tel. +41 (0)81 257 37 12
flv@tba.gr.ch  |  Pagina-web  |  Impressum
 
© 2022, Uffizi da construcziun bassa, Servetsch per il traffic betg motorisà. Tut ils dretgs resalvads.
 
 
Ein Shared Service von Graubünden Ferien