Navigation

Inhaltsbereich

Ils dis vegnan pli curts, i fa notg adina pli baud. Or d'experientscha profitan figuras obscuras dal fatg ch'i vegn stgir ad uras durant il temp d'atun e d'enviern per commetter uschenumnads enguladitschs sin il far notg. Cun intginas mesiras da precauziun pon ins evitar la ristga da daventar sez la victima d'in enguladitsch. Il post spezialisà "prevenziun" da la polizia chantunala dal Grischun a Cuira cusseglia.

Ladras e laders arrivan anc adina tras portas e fanestras en chasa. In enguladitsch en las atgnas quatter paraids è in grond schoc per blera glieud, saja ella giuvna u veglia. La violaziun da la sfera privata, la perdita dal sentiment da segirezza u las grevas consequenzas psichicas che pon sa mussar suenter in enguladitsch fan savens dapli quitads ch'il donn material sco tal. Ch'ins po sa proteger cunter quai mussa l'experientscha da la polizia. En blers cas resti in'emprova d'in enguladisch, betg sco ultim pervia dals indrizs tecnics da segirezza. Ma er in cumportament correct e l'attenziun da las vischinas e dals vischins pon impedir enguladitschs.

Cussegls co che Vus pudais proteger effizientamain Vus sezs e Vossa proprietad As dat la broschura ”Einbruch – nicht bei mir!" che Vus pudais retrair gratuitamain tar mintga post da polizia u tar il post spezialisà "prevenziun" da la polizia chantunala dal Grischun a Cuira. Quella broschura po natiralmain tractar mo in pèr cussegls. Perquai che la broschura n'è betg buna da substituir ina cussegliaziun individuala. Per far la segira, As drizzais Vus il meglier al post spezialisà "prevenziun" sut il numer da telefon gratuit 0800 80 30 50 ed As laschais cussegliar là gratuitamain ed objectivamain davart las mesiras da segirezza ch'èn raschunaivlas e recumandablas per Vossa chasa u per Vossa abitaziun or da la vista da la polizia.