Zum Seiteninhalt

Uffizi forestal dal Grischun

L’uffizi forestal dal grischun (er numnà «servetsch forestal chantunal») è in post da servetsch dal departament da construcziun, traffic e selvicultura. A l’uffizi forestal èn suttamessas las tschintg regiuns cun 29 uffizis forestals circuitals sco er ils curtins forestals a Roten, Mustér e S-chanf.

L’uffizi forestal dal Grischun è il post spezialisà dal chantun per il guaud. Tenor sia incumbensa è el respunsabel per l’execuziun da la lescha da guaud. Las collavuraturas ed ils collavuraturs da l’uffizi forestal han l’incumbensa da s’engaschar per ils basegns da la societad vi dal guaud e per il mantegniment dals guauds en lurquantitad (surfatschas) e qualitad (confurm al lieu).

L’uffizi forestal ademplescha quest’incumbensa cun cussegliar d’ina vart ils proprietaris da guaud en dumondas d’utilisaziun e cun dar sustegns finanzials. Da l’autra vart procura el per la tgira minimala dals guauds muntagnards. Be uschia po vegnir garantida vinavant la protecziun d’abitadis e colliaziuns da traffic tras il guaud.

Prestaziuns activas èn il sustegn dals proprietaris da guaud en dumondas da tgira da guaud ed incumbensas da protecziun da la natira sco er tar la construcziun d’edifizis da protecziun cunter catastrofas da la natira e d’infrastructuras adattadas per la cultivaziun dal guaud. L’exclusiun da zonas da privel en il rom da la planisaziun d’utilisaziun, la scolaziun dal persunal forestal, l’infurmaziun da la publicitad, la prevenziun da donns da guaud e l’assistenza a las gestiuns forestalas valan sco mesiras preventivas. A moda suverana, quai vul dir en il senn d’ina incumbensa legala dal stadi, vegn il guaud protegì d’intervenziuns nunlubidas e vegn reglamentada l’utilisaziun dal guaud. Qua tiers quinta per exempel er la rolla dominanta dal servetsch forestal chantunal tar l’accordanza dals differents interess vi dal guaud.

La Basas giuridicas vertenta per il servetsch forestal dal Grischun furma la lescha da guaud dals 25 da zercladur 1995, nua ch’i vegnan fixads il mantegniment qualitativ e quantitativ dal guaud, l’adempliment optimal da las funcziuns dal guaud, surtut la funcziun da protecziun, la protecziun dal guaud sco cuminanza da viver natirala e la promoziun ed il mantegniment da l’economia da guaud e da lenna. Ultra da quai èn d’observar ina seria d’ulteriuras leschas ed ordinaziuns da la confederaziun e dal chantun che giogan ina rolla tar las incumbensas multifaras dal servetsch forestal.

Funcziuns dal guaud grischun

En il Grischun furma noss guaud ina basa da viver impurtanta per ils umans. El ha numerusas significaziuns e funcziuns.

  • El protegia cunter lavinas, crappa, auazuns, bovas ed erosiuns dal terren. In terz dal guaud grischun ha ina funcziun speziala da protecziun che ha in effect direct sin abitadis e vias da traffic.
  • El furnescha cun la lenna ina materia prima ecologica. Lenna vegn duvrada sco material da construcziun, da lavur u da combustiun ed è la basa d’existenza da l’industria d’elavuraziun da laina. Ins po s’orientar davart la purschida da lenna grischuna tar la bursa da lenna da la Selva.
  • L’uman po sa recrear en il guaud, far sport sco er stgaffir e mantegnair ina relaziun cun la natira. Il guaud furnescha oxigen, accumulescha aua da baiver e gida a mantegnair l’aria pura. El ha in effect equilibrant en fasas da setgira e chalira extrema sco er en cas da vents ferms.
  • Il guaud è in spazi da viver natiral per numerusas spezias d’animals e da plantas. Il guaud è ina part da nossa cuntrada cultivada e vegn tgirà a moda persistenta. Il guaud furma la cuntrada ed è ina insla da calma en in ambient che sa mida permanentamain.

Il guaud grischun en cifras

Ils facts e las cifras las pli impurtantas en connex cun il guaud grischun:

  • Circa 27% da la surfatscha dal chantun è cuverta da guaud.
  • Las plantas en ils guauds dal Grischun possedan communablamain ina provisiun da lenna da circa 52 milliuns meters cubics. Quai correspunda ad in cubus da 373 meters per vart!
  • Durant ils davos diesch onns han ins utilisà en guauds publics e privats en media 337'000 meters cubics lenna per onn. La quantitad da lenna utilisada annualmain correspunda ad in cubus da stgars 70 meters!
  • Il stadi da sanadad dal guaud vegn mesirà vi da la perdita da feglia e guglias. La quantitad da plantas cun tschimas cleras remartgablas en la regiun muntagnarda è s’augmentada tranter 1985 e 1997 da 10% a 19%.

En il Grischun datti blers pigns sin tut las autezzas. Il larisch ed il schiember prefereschan en emprima lingia posiziuns situadas pli aut, entant ch’il tieu sa chatta da chasa en lieus spezialmain sitgs. Las plantas da feglia èn represchentadas en quantitad pitschna, sch’ins cumpareglia ellas cun las plantas da guglias. En il Grischun entupain nus oravant tut il fau (val dal Rain, part anteriura dal Partenz), igl ischi da muntogna ed il fraissen. En las valladas dal sid (Puschlav, Bergiaglia e Mesauc) datti blers chastagners e ruvers, sper ils flums savens era salischs ed ogns.

Privel d’incendis da guaud ed incendis da guaud

Sin nossa website chattais Vus ina charta cun il privel actual d’incendis da guaud en las regiuns. Questa vegn adina puspè actualisada. A la medema charta ch’è adina actuala pudais Vus s’infurmar davart las regiuns cun in scumond da far fieu decretà dal chantun. En questas regiuns èsi absolutamain scumandà da far fieu en il guaud u en sia vischinanza. Er en las regiuns senza scumond da far fieu èsi inditgà d’esser fitg precaut en il contact cun fieu. Ultra da quai pon las vischnancas relaschar atgnas disposiziuns davart il scumond da far fieu. Questas èn spezialmain d’observar!

Incendis da guaud pon ins evitar cun

  • observar las infurmaziuns dal radio, da la televisiun e da las gasettas
  • s’infurmar tar il servetsch forestal u tar ils pumpiers
  • esser precaut en il contact cun battafieus e products da tubac
  • annunziar immediatamain al telefon nr. 118 incendis da guaud ch’ins ha observà.

Il servetsch forestal chantunal surveglia la situaziun privlusa e scumonda da far fieu en il guaud u en sia vischinanza en cas da privel pli acut d’incendis da guaud. Las vischnancas pon sezzas relaschar prescripziuns anc pli severas. Aschia vala en la pli gronda part da las vischnancas da nossas valladas meridiunalas in scumond permanent da far fieu per via dal privel permanent d’incendis da guaud.

Il diever malprecaut da fieu avert en il guaud ed en sia vischinanza chaschuna cumprovadamain la pli gronda part dals incendis da guaud. Quai è il cas surtut durant e suenter envierns cun pauca naiv, suenter lungas periodas da setgira u en connex cun vents ferms.

En il Grischun vegnan registrads en media 20 incendis da guaud per onn. Da 1981 fin 1998 hai dà tut en tut 375 incendis da guaud; 102 da quels han pertutgà las valladas dal sid, 87 la Surselva, 72 il Grischun dal nord, 60 il Grischun central e 54 l’Engiadina. Sulettamain da 1996 fin 1998 hai dà quatter incendis gronds (Bever, avrigl 96, Brusio, mars 97, Mesauc, avrigl 97, Brusio, avrigl 98). Ils custs per stizzar il fieu èn sa muntads mintgamai a summas tranter plirs tschientmilli francs fin ad in milliun francs en il cas extrem.

Ils pumpiers ed il servetsch forestal èn cumpetents per cumbatter ils incendis da guaud ed èn er preparads correspundentamain. Dapi insaquants onns existan puncts da sustegn regiunals cun material per cumbatter incendis da guaud sco er concepts d'acziun per l'entir territori chantunal. Là nua ch’il guaud è avert cun vias d’access pon ins cumbatter incendis a moda pli sperta e pli effizienta. Da princip vegnan stizzads tut ils incendis da guaud sche pussaivel dal tuttafatg, perquai che er il pli pitschen fieu po avair consequenzas incalculablas!

Contacts & ulteriuras infurmaziuns

Sche Vus vulais prender si contact cun nus, chattais Vus en nossa website ina survista detagliada cun tut las adressas da noss collavuraturs a Cuira ed en las regiuns sco er ina charta cun la posiziun da noss uffizi.

Ultra da quai chattais Vus là