Zum Seiteninhalt

#MultitalentWald: Ans mussai Voss talent dal guaud

Il guaud ha blers talents. El è spazi da recreaziun per nus umans e spazi da viver per animals e per plantas. El serva sco protecziun cunter privels da la natira e sco furnitur da la materia prima preziusa lain. Scuvri qua la diversitad dal guaud grischun.

Il guaud fa part da noss spazi da viver. Ins na sa strusch pli imaginar ina cuntrada senza guaud. Circa 30 pertschient da la surfatscha dal chantun Grischun è cuverta cun guaud. La surfatscha da guaud crescha ad in crescher, ils ultims 30 onns per en media 1400 hectaras per onn. Quai correspunda circa a 2000 plazzas da ballape mintga onn. Per che nus possian profitar er en l'avegnir dals avantatgs dal guaud, sto quel vegnir protegì, tgirà ed utilisà en moda persistenta. Questa incumbensa n'è betg facila, perquai ch'i ston vegnir resguardads differents basegns e coordinadas ina cun l'autra las pretensiuns multifaras. La funcziun la pli impurtanta dal guaud grischun è la protecziun cunter privels da la natira. Pervia da quai ha il guaud da protecziun, che cumpiglia circa 61 pertschient da la surfatscha da guaud dal Grischun, ina impurtanza speziala. Co ch'i va actualmain al guaud grischun, mussa il rapport davart la persistenza ch'è vegnì publitgà il zercladur 2018.

 

Waldi infurmescha davart il guaud

Waldi informiert über den Wald
Mo tgi ch'enconuscha il guaud e tgi ch'è conscient da quest sistem ecologic cumplex e varià, vesa la vaira valur da mintga singul bostg. Pervia da quai avain nus prendì en mira d'infurmar la populaziun grischuna en moda ligera e tuttina infurmativa davart ils differents talents dal guaud. Questa incumbensa surpiglia il stgilat Waldi per nus. Waldi sez viva en il guaud ed enconuscha fitg bain tut las abitantas ed ils abitants dal guaud sco er tut ils chantuns da quel, er ils pli secrets. Waldi vegnis Vus a vesair il proxim temp en differents lieus: sin la pagina d'internet www.multitalentwald.ch, sin ina charta da guaud che Vus pudais duvrar per far in viadi d'exploraziun, e dapertut, nua ch'i dat da rapportar chaussas interessantas davart il guaud.

 

Tge è Voss talent dal guaud?

Ans mussai tge talent ch'il guaud grischun ha per Vus. Tschertgadas vegnan las meglras fotografias dal guaud che vegnan publitgadas sin Instagram cun il hashtag #MultitalentWald. Durant in onn – dal fanadur 2018 fin il zercladur 2019 – vegn premiada u premià mintga mais ina fotografa u in fotograf per la fotografia da talent dal guaud dal mais. Ed uschia pudais Vus prender part a la concurrenza*:

  • chargiar in'atgna fotografia sin Instagram
  • segnar la fotografia cun il hashtag #MultitalentWald
  • la fotografia cumpara alura sin Instagram e sin nossa paraid sociala #MultitalentWald e po vegnir commentada e marcada cun «likes»
  • Mintga mais vegn ina fotografia premiada sco «fotografia dal mais» e publitgada sin nossa pagina d'internet e tar Facebook

La victura u il victur survegn in pitschen regal.

 

*Cundiziuns da participaziun: Tut las fotografias che vegnan publitgadas tenor l'instrucziun qua survart d'in profil d'Instragram public, prendan part a la concurrenza. Resguardadas vegnan tut las publicaziuns che vegnan fatgas entaifer in mais sin Instagram. Cun il nov mais cumenza la concurrenza puspè da nov. Cun la participaziun vegnan acceptadas las suandantas cundiziuns: Las fotografias vegnan publitgadas sin la paraid sociala cun in link sin il profil d'Instagram. La victura u il victur dal mais vegn communitgada u communitgà en l'internet e sin Facebook. Tut las fotografias publitgadas stattan a disposiziun a l'uffizi da guaud e privels da la natira dal Grischun. Quel po far diever da quellas libramain cun inditgar la funtauna.