Zum Seiteninhalt

Finamiras da proprietari dal chantun Grischun per la Repower SA

Pervia da la nova orientaziun strategica da la Repower SA ha la regenza surlavurà las finamiras da sia participaziun a l'interpresa grischuna d'energia.

La Repower SA ha concludì ina nova strategia manaschiala l'onn 2016. Cun quella mussa ella d'esser cleramain per la forza idraulica grischuna. Ultra da quai vul ella producir 100% da sia forza electrica cun energias regenerablas. Ulteriurs elements principals da la nova strategia manaschiala èn l'extensiun dal sectur dals servetschs e da la distribuziun sco er il svilup da soluziuns per raits e sistems intelligents. La finamira da la nova orientaziun è quella da reducir la dependenza dal pretsch d'electricitad.

Grazia ad in augment dal chapital èsi sta pussaivel da schlargiar l'acziunariat da la Repower, en il qual èn represchentads - ultra dal chantun Grischun e da l'Axpo holding SA sco acziunaris principals vertents - da nov er las ovras elextricas dal chantun Turitg (EKZ) e la UBS Clean Energy Infrastructure Switzerland SA (UBS CEIS) cun participaziuns substanzialas. Cun 21,96 pertschient resta il chantun Grischun l'acziunari il segund grond da la societad.

La regenza ha prendì quest svilup sco occasiun per examinar e per fixar da nov l'engaschament chantunal tar la Repower SA. Cun finamiras da proprietari correspundentas èn vegnidas concretisadas las novas finamiras e las aspectativas a la Repower SA.