Tunnel Andermatt - Sedrun (traject da l'Alpsu)

1. Situaziun da partenza

 
Areguard il traffic èn il chantun Grischun ed il chantun Uri colliads in cun l'auter sur l'Alpsu, e quai tras la via chantunala e tras la Viafier Matterhorn-Gottard. Cunquai che la via sur il pass è serrada durant l'enviern per il traffic privat, èn Sedrun ed Andermatt colliads in cun l'auter unicamain sur la lingia da viafier. Il chantun Grischun ed il chantun Uri èn interessads da meglierar questa colliaziun da viafier ch'è averta durant l'entir onn. Circuls politics han plinavant suttamess la pretensiun d'ina colliaziun directa tranter Andermatt e Sedrun cun in tunnel da viafier.

 

Perquai han ils chantuns Uri e Grischun concludì da dar cuminaivlamain en incumbensa in studi d'adequatezza che duai eruir variantas da soluziun pussaivlas sco er mussar las schanzas da realisabladad e la rentabilitad. La meglieraziun da la colliaziun da viafier tranter Sedrun ed Andermatt e da la purschida dal traffic public duai tegnair quint da las necessitads economicas e turisticas da la regiun dal Gottard. 

 

2. Finamiras dal studi

  • Cumparegliaziun tranter in project d'in tunnel e l'optimaziun da la colliaziun da viafier existenta sur l'Alpsu.   
  • Eruir variantas da renovaziun pussaivlas per la colliaziun da viafier existenta cun in eventual traject nov resp. cun l'adattaziun dal traject existent.
  • Las meglieraziuns previsas han principalmain las suandantas finamiras:

            1. capacitads pli grondas (trens pli lungs)

            2. purschida pli gronda (trens supplementars, urari pli spess)

            3. temps da viadi pli curts (per trens pli svelts sto il traject permetter tempos pli gronds)

            4. augment da la segirezza (d'enviern) (disponibladad da la purschida)

 

3. Incumbensas 

  • Skizzar las soluziuns tecnicas pussaivlas tant per renovar il traject da la Viafier Matterhorn-Gottard sur l'Alpsu sco er per construir in tunnel da viafier tranter Andermatt e Sedrun.
  • Valitar ils effects per l'economia publica da la regiun che resultan tras questas variantas principalas (ina u l'autra), inclusiv ina terza varianta d'ina "soluziun da tunnel cun mantegnair il traject da muntogna".
  • Valitaziun qualitativa areguard la cuvrida dals basegns turistics e regiunals, da las cundiziuns dal lieu, dals custs sco er da las pretensiuns necessarias che resultan dal manaschi tecnic.
  • Mussar las schanzas da realisaziun e la rentabilitad.