Zum Seiteninhalt

Schef dal departament dr. Mario Cavigelli

 

Cordial bainvegni sin la pagina d'internet dal DCTS

 
Charas visitadras, chars visitaders

I ma fa plaschair che Vus visitais la pagina d'internet da mes departament. Vus pudais uschia As infurmar pli detagliadamain davart mias activitads en la publicitad, en la regenza ed en il departament da construcziun, traffic e selvicultura (DCTS). Er pudais Vus midar als uffizis dal DCTS ubain al secretari dal departament ed uschia As approfundar en ils differents champs d'incumbensas dal departament.

En mes departament ans fatschentain nus cun incumbensas dals secturs da la forza idraulica ed energia, dal traffic, da las vias, da las immobiglias, dals fatgs da submissiun, da la selvicultura sco er da la chatscha e pestga. Las finamiras centralas da nossa lavur èn las suandantas:

  • che l'infrastructura per il traffic individual e per il traffic public vegnia endrizzada e mantegnida tenor ils basegns;
  • che las resursas "aua", "energia" e "laina" vegnian duvradas en moda raziunala e persistenta; 
  • che las immobiglias da l'administraziun chantunala vegnian messas a disposiziun ed administradas en moda economica e confurm al temp;
  • ch'il guaud cun sias funcziuns multifaras (protecziun, utilisaziun, recreaziun) vegnia mantegnì sco part natirala da noss spazi da viver; 
  • ch'ils effectivs da selvaschina vegnian regulads e restian sauns e ch'ils effectivs da peschs vegnian tratgs a niz en moda persistenta e lur spazis da viver vegnian restabilids e protegids; 
  • ch'igl existian cundiziuns da basa per il maun public per ch'i dettia ina concurrenza gista per surdar las lavurs ed ils servetschs en moda favuraivla per l'economia.

Jau As envid cordialmain da discutar ensemen cun nus davart nossa lavur en il departament sco er davart mias incumbensas politicas en la publicitad ed en la regenza. Sche Vus avais dumondas u propostas en chaussa, ma contactai per plaschair per telefon u per mail.

Mario Cavigelli