Navigaziun principala

Cuntegn da la pagina

Mess en funcziun la chascharia sanada al Plantahof

Mess en funcziun la chascharia sanada al Plantahof
 
Il center da furmaziun e cussegliaziun agricula Plantahof a Landquart dispona da nov d'ina chascharia sanada cumplettamain. Grazia ad indrizis da chascharia moderns pon la scolaziun e la producziun al Plantahof vegnir meglieradas vinavant.

Il center da furmaziun e cussegliaziun agricula Plantahof a Landquart vegn manà sco manaschi certifitgà ISO cun ina incarica da prestaziun e cun in preventiv global ed el giauda ina stima che tanscha lunsch sur il cunfin dal chantun ora. Cunzunt las allevaturas ed ils allevaturs d'animals sco er las possessuras ed ils possessurs da muaglia da l'entira Svizra e da l'exteriur germanofon apprezieschan la tradiziun da seminaris da furmaziun supplementara, d'experiments pratics innovativs e d'ina tratga da muvel d'auta qualitad dal Plantahof. Ma er la scolaziuns da pura e da pur che vegnan purschidas valan sin plaun naziunal sco modernas, variadas e pretensiusas.

Lavurs da sanaziun tenor MINERGIE

La chascharia dal Plantahof è vegnida construida l'onn 1957 da l'architect G. Schäfer, Cuira. Suenter passa 50 onns d'utilisaziun intensiva ha l'edifizi gì in basegn da sanaziun che correspunda a sia vegliadetgna. Entaifer 7 mais èn vegnids sanads ils mirs exteriurs ed ils indrizs da la tecnica da chasa tenor il standard da MINERGIE per var 1,7 milliuns francs, quai sut la direcziun da Marcel Liesch, architect, Cuira. Per ils mantels da la fatschada èn vegnidas duvradas schlondas da laresch. Ils indrizis da la chascharia èn vegnids adattads al standard tecnic actual, ils andaments da manaschi èn vegnids optimads, ed igl èn vegnids construids access tenor ils basegns da persunas cun impediments. Las grondas fanestras porschan da nov a las visitadras ed als visitaders ina invista en la producziun al plaunterren, nua che sa chattan la chascharia, la producziun da spezialitads sco er il labor da culturas. Al plaun sutterran sa chattan las localitads da deposit, al plaun sura ils biros e las abitaziuns da persunal. Tras la sanaziun exemplarica da l'edifici e dal manaschi da la chascharia vegn rinforzada vinavant la preschientscha dal Plantahof.

Augmentada purschida da scolaziun e da products

Ils indrizs moderns pussibiliteschan al center da furmaziun e cussegliaziun agricula da realisar confurm al temp e da meglierar vinavant la scolaziun da signunas e signuns d'alp sco er da las puras e dals purs ch'elavureschan latg. Ultra da quai serva la chascharia renovada a la raffinaziun dal latg dal manaschi per far spezialitads per il negozi sin il bain puril e per il center da dietas. Ultra da la producziun da products enconuschents duain er vegnir creadas novas ideas per il martgà.

La sonda, ils 26 d'october 2013, a partir da las 10.00 (di dal Plantahof), ha lieu in di da las portas avertas.