Zum Seiteninhalt

Stabiliment giudizial Realta: Eruì il victur da la concurrenza per il stabiliment nov

Il team da planisaziun generala "La Nicca" sut l'egida dals architects Dieter Jüngling ed Andreas Hagmann da Cuira po planisar il nov stabiliment giudizial Realta a Cazis.

Cunquai che la situaziun en il stabiliment giudizial serrà Sennhof a Cuira è nuncuntentaivla e tras quai ch'il basegn da plazzas d'execuziun en il concordat davart l'execuziun giudiziala da la Svizra orientala è cumprovà, è vegnì elavurà in rapport strategic davart il svilup da l'execuziun giudiziala en il Grischun. Per la regenza è quest rapport stà la basa per decider, sch'i duess vegnir investì vinavant en il stabiliment giudizial existent Sennhof, sch'i duess vegnir realisà in stabiliment nov sin l'areal Realta a Cazas u sche l'execuziun serrada da chastis e da mesiras en il Grischun duess vegnir smessa dal tuttafatg.

A medem temp sco l'elavuraziun dal rapport strategic è vegnida fatga – ensemen cun l'uffizi federal da giustia e cun experts envidads – ina planisaziun da test per ina praschun nova cun 150 plazzas. La situaziun entaifer l'areal Realta a Cazas ha uschia pudì vegnir giuditgada en il context general da bleras consideraziuns ed ha pudì vegnir determinada en la planisaziun dal territori.

Ina reuniun da tut ils stabiliments giudizials dal chantun sin l'areal Realta a Cazas ha ils avantatgs ch'ins po trair a niz sinergias tranter l'execuziun giudiziala averta e serrada, sbassar ils custs da collocaziun, augmentar la segirezza sco er crear circa 80 plazzas da lavur supplementaras en l'execuziun.

Il schaner 2013 ha la regenza prendì enconuschientscha en moda affirmativa dal rapport strategic ed ha incumbensà l'uffizi chantunal da construcziun auta da realisar ina concurrenza. Pervia da sia impurtanza è il project vegnì integrà en las finamiras strategicas da la regenza (program da la regenza 2013-2016).

Resguardà er il svilup da l'execuziun da chastis
Tras la realisaziun da la concurrenza selectiva en furma d'ina concurrenza da tesas è vegnì tschertgà in team da planisaziun generala ch'è d'ina vart qualifitgà da realisar la construcziun cumplexa d'in stabiliment giudizial en in'auta qualitad sco er en il rom dals custs determinads ed entaifer ils termins fixads. Da l'autra vart èsi dentant er vegnì pretendì ch'in tal team da planisaziun sa profileschia – a maun d'in svilup da tesas davart la tematica da l'execuziun da chastis moderna sco er da l'effect da concepts architectonics – sco fundà e prospectiv.

Da las 27 annunzias inoltradas ha la giuria selecziunà las sis propostas cun las meglras valitaziuns per il segund stgalim da concurrenza ch'è vegnì tegnì anonim (concurrenza da tesas). Tut ils sis dossiers da tesas inoltrads èn vegnids giuditgads tenor criteris determinads. La giuria è sa decidida unanimamain per il dossier "Step by Step" dal team da planisaziun generala "La Nicca" sut l'egida dals architects Dieter Jüngling ed Andreas Hagmann da Cuira.

"Step by Step"
La contribuziun da tesas sa distingua tras ina vasta retschertga da l'istorgia pli giuvna, ma er da las tendenzas actualas en l'execuziun da chastis, tras in'analisa exacta dal project da test e – sin basa da tala – tras propostas d'adattaziun, e la finala tras ina strategia fatga precisamain sin mesira per l'incumbensa en vista a la planisaziun e la construcziun dal stabiliment giudizial.

Il team da planisaziun ha persvadì la giuria tras sia contribuziun da tesas ch'è tras e tras coerenta e che porscha tant ina survista panoramica sco er retschertgas detagliadas cun mesiras concretas fin en ils detagls. La giuria stima en spezial la cumpetenza objectiva e fundada che sa tira tras l'entira contribuziun.

Urari e custs
Fin la fin da l'onn 2014 vegn sviluppà ensemen cun il team victur in project da missiva. Quel serva al cussegl grond sco basa per la decisiun da credit ch'è previsa l'avrigl 2015.

Cun las lavurs da construcziun duai vegnir cumenzà la primavaira 2016. Las lavurs duessan esser terminadas la fin da l'onn 2018.
I vegn fatg quint cun custs d'investiziun bruts da 106 milliuns francs. Als custs imputabels paja la confederaziun ina contribuziun da construcziun da 30 pertschient.