Zum Seiteninhalt

graubündenBIKE 2010 – 2015

Il project graubündenBIKE ha pudì vegnir terminà cun success mez da l'onn 2015. Cun il project ha la regenza dal chantun Grischun vulì promover persistentamain e sviluppar vinavant questa part pli e pli impurtanta da la purschida dal turissem da stad. Quai cun la finamira d'augmentar cleramain la creaziun da valurs e da segirar tala a lunga vista. Il Grischun cun sia cuntrada multifara, cun sia vasta rait da vias e cun sia buna avertura tras il traffic public è adattà en moda excellenta per l'ir cun velo da muntogna. Ina part impurtanta dal project è dentant bain stada quella da cumbatter cunter las consequenzas negativas da questa disciplina da sport prosperaivla sin l'ambient e sin ils auters utilisaders da las sendas.

En in emprim pass ha il biro Allegra turissem ch'è spezialisà per il turissem da velos da muntogna fatg in concept da basa l'onn 2009. En intervistas cun las destinaziuns turisticas e cun auters purtaders da prestaziuns turisticas èn vegnidas evaluada la situaziun actuala, definidas finamiras e proponidas mesiras concretas. Quellas pon vegnir repartidas en trais secturs principals: infrastructura, marketing e transports. Durant ils onns 2010 fin 2015 – partind da las 30 mesiras dal concept – èn vegnidas surdadas circa 100 incumbensas a biros da planisaziun ed a purtaders da prestaziuns turisticas d'ina valur da totalmain 4,7 milliuns francs inclusiv las grondas atgnas prestaziuns da las instanzas participadas. Las recumandaziuns, las enconuschientschas da basa, las introducziuns e las prescripziuns èn vegnids resumadas en in manual che stat a disposiziun online a tut las persunas participadas. En il fratemp èn resultadas uschia 35 contribuziuns. Ina rolla impurtanta giogan standards da qualitad liants ed instruments standardisads che permettan a las singulas destinaziuns da sviluppar vinavant e da vender lur purschidas specificas sin in standard aut sut il label graubünden.

graubündenBIKE – per vias (da traffic betg motorisà) cuminaivlas, BULLETIN D'INFURMAZIUN 01/2015 Conferenza Velo Svizra (en tudestg)