Zum Seiteninhalt

grischunHIKE promova il turissem da viandar

Dapi il cumenzament dal turissem è il Grischun ina da las destinaziuns da vacanzas las pli popularas da la Svizra. Per augmentar la cumpetitivitad dal chantun Grischun e pia la creaziun da valurs ha il chantun – suenter l'antecessur prosperaivel grischunBIKE – elavurà il concept grischunHIKE en collavuraziun cun in biro da turissem. En la consultaziun tar ils uffizis e tar ils purtaders da prestaziuns turisticas ha il concept chattà in vast consentiment.
 
L'atun 2014 ha la regenza approvà il project ed incumbensà il post spezialisà per il traffic betg motorisà da realisar quel en collavuraziun cun ils purtaders da prestaziuns turisticas dal chantun. La primavaira 2015 è el vegnì lantschà. Ils custs totals èn budgetads a 3,2 milliuns francs, dals quals surpiglian il chantun e la confederaziun ina mesadad. L'autra mesadad duai vegnir furnida tras atgnas prestaziuns dals partenaris dal project cun elavurar las mesiras.
 
Il concept dal project prevesa tut en tut 33 mesiras per meglierar las cundiziuns generalas dal turissem da viandar. Questas mesiras sa repartan sin otg secturs tematics: rait da vias ed infrastructura, transport, alloschament ed ustarias, guidas, purschida e servetschs, cultura da viandar locala, events sco er organisaziun e colliaziun en ina rait.
 
Las mesiras elavuradas vegnan documentadas en moda cumplessiva per ch'ils resultats dal project possian vegnir duvrads persistentamain da tut ils acturs dal turissem da viandar.