Zum Seiteninhalt

graubündenMOBIL, traffic betg motorisà per il temp liber e per il turissem

Il Grischun vul daventar l'emprim purschider d'ina recreaziun activa en la natira che cumpiglia las disciplinas da sport ir cun velo, ir cun velo da muntogna, viandar, chaminar a la Scandinavia (nordic walking), viandar l'enviern sco er ulteriuras activitads da la human powered mobility.
 
Las suandantas finamiras vegnan prendidas en mira:
  • promover la "recreaziun activa en la natira" sco activitad da temp liber e da turissem sauna sco er che spargna resursas en cumbinaziun cun il traffic public e privat;
  • augmentar la cumpetitivitad dal chantun Grischun; augmentar las pernottaziuns durant la primavaira/la stad/l'atun; augmentar las frequenzas da las interpresas da transport e pia garantir ils uraris;
  • rinforzar la marca graubünden cun ina purschida che vegn communitgada centralmain;
  • crear in'auta rentabilitad economica en las regiuns tras in'utilisaziun persistenta da l'infrastructura da la cuntrada e culturala multifara ed unica dal chantun;
  • sviluppar vinavant specificamain per il chantun e cumplementarmain la purschida da SvizraMobila a graubündenMOBIL ed accordanza cun il project SvizraMobila local;
  • rinforzar la posiziun dal Grischun sco LA regiun da vacanzas che signifitga la pli auta perceptibilitad da las valurs natiralas e culturalas.
Cun questa strategia duain vegnir cuntanschidas las suandantas finamiras:
  • las purschidas existentas vegnan sviluppadas vinavant resp. amplifitgadas tenor prescripziuns che valan per l'entir chantun. En moda particulara sto vegnir observada la colliaziun cumplessiva cun il traffic public e privat, cun ils manaschis d'hotellaria e da restauraziun, cun las interpresas da telefericas e cun ulteriuras purschidas turisticas;
  • la qualitad da l'infrastructura da vias e da rutas vegn garantida observond las normas e las directivas existentas;
  • la purschida da l'hotellaria e da la gastronomia vegn orientada specificamain tenor ils basegns da la recreaziun activa en la natira;
  • en in'emprima fasa è vegnì realisà il project parzial graubündenBIKE per la sparta fitg prosperaivla dal velo da muntogna durant ils onns 2010 - 2015. Quest project serva a medem temp sco project da pilot per il project consecutiv graubündenHIKE;
  • graubündenMOBIL vegn realisà per las ulteriuras spartas velo, viandar, chaminar a la Scandinavia e viandar l'enviern durant ils proxims onns tenor basegn e tenor las experientschas fatgas.