Zum Seiteninhalt

Construcziuns cunter l’aua

La protecziun da las zonas d'abitadi sco er dals stabiliments da traffic e dals ulteriurs stabiliments d'infrastructura cunter aua gronda dals auals e dals flums è tenor la lescha chantunala davart la correcziun dals curs d'aua (LCCA) da princip ina incumbensa da las vischnancas. Sco post spezialisà per la correcziun dals curs d'aua surveglia l'uffizi da construcziun bassa dal Grischun en quest connex las vischnancas, coordinescha las mesiras necessarias en moda intercommunala e cusseglia e sustegna las vischnancas tar lur activitads da la polizia da construcziuns idraulicas. Per il Grischun sco chantun dals 100 torrents e flums èsi fitg impurtant en quest connex che las funcziuns ecologicas ed ils spazis da viver natirals da las auas vegnian mantegnids tant sco pussaivel e refatgs cur che questas incumbensas vegnan realisadas.

Il chantun Grischun è bain ina chombra d'aua, ma el è er pertutgà periodicamain da grondas inundaziuns. Dapi che la confederaziun ed il chantun han stgaffì cun la legislaziun correspundenta il 19. tschientaner las premissas per contribuziuns a mesiras da construir rempars, èn vegnidas realisadas en tut il Grischun bleras dustanzas. Uschia han pudì vegnir stgaffidas las premissas per il svilup d'abitadis e da vias da traffic. Fin il cumenzament dal 20. tschientaner è vegnida curregida la gronda part dals flums gronds en il territori abità. Ultra da la protecziun cunter inundaziuns è il gudogn da terren cultivabel ch'è vegnì pussibilità uschia stà in dals facturs decisivs. Il creschament cuntinuà da la zona d'abitadi e l'utilisaziun ch'è stada colliada cun quai han chaschunà intervenziuns en las auas cun disturbis per part massivs da la funcziun ecologica da la zona da l'aua currenta. Grazia a quai che la conscienza ecologica è sa sviluppada pli e pli, è sa fatga valair oz la chapientscha che correcziuns d'auas ston resguardar – ultra d'ina funcziun da protecziun sco tala – er finamiras ecologicas, economicas e planisatoricas.

Integrond la planisaziun dal territori è perquai sa sviluppada ils ultims onns la protecziun persistenta cunter aua gronda. Quai vul dir da betg viver per mintga pretsch cunter l'aua gronda, mabain sche pussaivel cun l'aua gronda e da ponderar ils avantatgs ecologics ed ils dischavantatgs economics. Pir cur ch'ils instrument da la planisaziun dal territori na bastan pli, vegnan prendidas mesiras da correcziun dals curs d'aua ch'èn economicamain supportablas. In instrument impurtant en quest connex è il giudicament da la periclitaziun. Cun retschertgas voluminusas vegnan fatgas chartas da privels, e quai cun resguardar las datas d'eveniments e cun applitgar las metodas da calculaziun las pli modernas. Questas chartas da privels duain mussar per mintga parcella, cun tge frequenza e cun tge intensitad ch'i sto vegnir fatg quint che la zona d'abitadi vegnia inundada.