Champ d'incumbensas
Questa professiun variada cumpiglia la collavuraziun en teams e la cooperaziun en projects. Ti gidas a sviluppar novas soluziuns ed optimeschas sistems e process existents en il manaschi. L'informatica è omnipreschenta – perquai è questa scolaziun ina buna basa per sa spezialisar pli tard.
Il plan d'instrucziun prevesa las direcziuns Svilup da plattafurmas e Svilup d'applicaziuns. Tar il chantun Grischun pos ti ta scolar en la direcziun Svilup da plattafurmas cun las suandantas activitads principalas:
- Ti planiseschas, administreschas e tgiras sistems e servetschs da server fisics u virtuals.
- Ti planiseschas raits localas (LAN), tschernas cumponentas da rait adattadas, installeschas e configureschas quellas e surveglias il manaschi current.
- Ti t'occupas da la segirezza e da la disponibladad dals sistems e dals servetschs sco er da la capacitad da la rait.
- Ti procuras che las infurmaziuns sajan protegidas e possian vegnir derasadas en moda segira.
- Ti collavuras en differents projects.
Questa direcziun vegn purschida da l'Uffizi d'informatica a Cuira e da l'Uffizi da construcziun bassa, secziun Tecnica a Tusaun.
Tias fermezzas èn
- Abilitad da lavurar en in team
- Pensar logic-abstract
- Creativitad en la tschertga da soluziuns
- Bun dun receptiv
- Imaginaziun tridimensiunala
- Fitg buna abilitad da sa concentrar
- Moda sistematica da lavurar
- Pazienza e perseveranza
- Bunas enconuschientschas da l'englais
- Multicheck
Accents da la scolaziun
Ultra da la scolaziun professiunala èn er la promoziun ed il svilup da la cumpetenza metodica, sociala e persunala parts impurtantas da tia scolaziun. Quai na ta gida betg mo a dumagnar las differentas pretensiuns sin plaun professiunal, mabain er sin plaun interuman.
Scolaziun
| Durada: |
4 onns |
| Scola: |
ca. 2 dis per emna scola professiunala
En cas da fitg bunas prestaziuns en scola vegn sustegnida la frequentaziun da la scolaziun da maturitad professiunala (en moda cumplementara a l'emprendissadi).
ca. 30 dis curs intermanaschials
|
| Finiziun: |
attestat federal da qualificaziun "Informaticher/-cra AFQ"
attestat federal da qualificaziun "Informaticher/-cra da manaschi AFQ" |
Pretensiun
- Scola populara terminada
- Fitg bunas prestaziuns en ils roms da la scienza natirala e da la matematica
Pussaivladads d'absolver furmaziuns supplementaras suenter l'emprendissadi
La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras, sco:
- Curs da scolas professiunalas e da scolas spezialisadas, da scolas autas, da differentas federaziuns professiunalas sco er da furniturs da soft- e da hardware
- Cun certificat professiunal federal: ICT-sviluppadra/sviluppader d'applicaziuns, ICT-tecnicista/tecnicist da sistem e da rait, spezialista/spezialist d'informatica economica, mediamaticra/mediamaticher
- Managera/manager ICT dipl., ICT security expert dipl. (planisà a patir dal 2018)
- Scolaziuns en il sectur spezial informatica, p.ex. spezialista/spezialist d'informatica economica SSS, tecnicista/tecnicist SSS d'informatica ed auter
- Studis en il sectur spezial informatica, p.ex. bachelor SAS en informatica, bachelor SAS en informatica economica