Cuntegn da la pagina

Spezialist/-a da commerzi en detagl AFQ (gestiun/papetaria)

-
 

Champ d'incumbensas
Ti empostas rauba tar ils producents u tar las firmas da furniziun, controllas l'entrada correcta a maun da glistas da furniziun e procuras per ina magasinaziun irreproschabla. Ti enconuschas ils pretschs da vendita e das attenziun che tut saja etichettà correctamain. Ti enconuschas ils products en il sortiment e pos cussegliar la clientella en moda amicabla e cumpetenta. Cun instruments moderns per registrar datas survesas e coordineschas ti la circulaziun da rauba dals furniturs fin al post da vendita.

 

Tias fermezzas èn:

  • plaschair da la vendita e da la cussegliaziun
  • plaschair dal contact cun umans
  • abilitad da communitgar
  • demananza curtaschaivla
  • eloquenza a bucca ed en scrit
  • bun dun receptiv
  • talent organisatoric
  • dun per cifras
  • enconuschientschas da linguas estras
  • prontezza da prestar servetschs
  • cumportament tenor ils basegns da la clientella
  • interess per lavurs administrativas
  • plaschair da lavurar cun computers

 

Accents da la scolaziun

Ti vegns scolada/scolà en plirs champs d'activitad cun ils accents da furmaziun: enconuschientschas dal manaschi e dal sortiment, cussegliaziun, gestiun. La basa per la scolaziun manaschiala è – ultra da la promoziun da la part professiunala – il svilup da la cumpetenza metodica, sociala e persunala. Quai vul dir che ti t'acquistas durant tia scolaziun la savida e las enconuschientschas professiunalas da giudim ensi e che ti es en cas da dumagnar las pretensiuns en il sectur interuman e professiunal.

 

Scolaziun

Durada: 3 onns
Scola:

1 1/2 dis per emna scola professiunala
En cas da fitg bunas prestaziuns en scola po vegnir frequentada la scolaziun da maturitad professiunala en moda cumplementara a l'emprendissadi.
10 dis curs intermanaschials

Finiziun: attestat federal da qualificaziun "spezialista/spezialist da commerzi en detagl AFQ"

 

Pretensiun

  • scola populara terminada

Pussaivladads d'absolver furmaziuns supplementaras suenter l'emprendissadi

La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras. In pèr exempels:

  • curs da differents purschiders         
  • cun certificat professiunal federal: spezialista/spezialist da commerzi en detagl, spezialista/spezialist da cumpra da provediment, spezialista/spezialist per manar ina gruppa, spezialista/spezialist da marketing, spezialista/spezialist da vendita per il servetsch intern u extern
  • managera/manager da commerzi en detagl cun diplom federal, manadra/manader da cumpras cun diplom federal, directura/directur da marketing dipl., manadra/manader da la vendita dipl., experta/expert per dumondas da manar dipl.
  • economa/econom da manaschi SSS dipl., managera/manager da marketing SSS dipl.
  • bachelor of science (SAS) en economia da manaschi