Cuntegn da la pagina

Spezialist/-a d'autos AFQ

-

 

Champ d'incumbensas:
Ti lavuras tar in uffizi da construcziun bassa ed es là responsabla u responsabel per mantegnair e per reparar ils differents vehichels, sco autos da persunas e da squadra, camiuns e schlavazzuns.

 

Tias fermezzas èn:

  • buna chapientscha tecnica
  • inschign manual
  • moda da lavurar exacta e conscienziusa
  • fidadadad e senn da responsabladad
  • abilitad da lavurar en in team
  • demananza curtaschaivla (contact cun la clientella)
  • pensar logic

 

Accents da la scolaziun

Ti fas independentamain lavurs generalas da service e da reparatura vi dals vehichels. Ti sas struvegiar, buglir, saldar, resgiar, fresar ed unscher. Ti midas l'ieli, remplazzas pneus isads, fas lavurs da mantegniment vi da l'illuminaziun, vi da l'indriz da climatisaziun, vi dals sistems da ventilaziun, d'envidada e d'injecziun. Ti sas leger ed interpretar documents tecnics, schemas e plans dals sistems electrics. En il sectur da l'electronica dals vehichels fas ti reparaturas pli simplas. La basa per la scolaziun manaschiala è – ultra da la promoziun da la part professiunala – il svilup da la cumpetenza metodica, sociala e persunala. Quai vul dir che ti t'acquistas durant tia scolaziun la savida e las enconuschientschas professiunalas da giudim ensi e che ti es en cas da dumagnar las pretensiuns en il sectur interuman e professiunal.

 

Scolaziun

Durada: 3 onns
Scola: 1. onn d'emprendissadi 1 1/2 dis per emna scola professiunala
2. e 3. onn d'emprendissadi 1 di per emna scola professiunala
differents curs intermanaschials
Finiziun: attestat federal da qualificaziun "spezialista/spezialist d'autos AFQ"

 

Pretensiun

  • scola populara terminada
  • test da qualificaziun UPSA

 

Pussaivladads d'absolver furmaziuns supplementaras suenter l'emprendissadi

La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras. In pèr exempels:

  • curs da l'uniun professiunala svizra da l'automobil (UPSA) e da las scolas professiunalas spezialisadas
  • examen mintgamai en l'auter sectur professiunal suenter 1 onn da pratica professiunala correspundenta
  • mecatronista/mecatronist d'autos AFQ (entrada en il 3. onn da la furmaziun da basa)
  • diagnosticra/diagnosticher d'automobils
  • cussegliadra/cussegliader da vendita d'autos
  • coordinatura/coordinatur da lavuratoris d'autos
  • restauratura/restauratur da vehichels
  • cussegliadra/cussegliader da servetsch a la clientella en la branscha d'automobils
  • spezialista/spezialist da pneus
  • gidantra stradala/gidanter stradal
  • economa/econom da manaschi dipl. dal sectur d'automobils
  • p.ex. tecnicista/tecnicist SSS da construcziun da maschinas dipl. u tecnicista/tecnicist SSS d'electrotecnica dipl.
  • bachelor of science (SAS) en tecnica d'automobils