Dapi ils 24 da schaner 2014 fa l'administraziun chantunala da taglia dal Grischun da nov part dals furniturs da servetsch che mettan a disposiziun lur quints er sin via electronica, uschenumnads quints electronics.

Quai vul dir che Vus avais ussa la pussaivladad d'As annunziar per quest nov servetsch, cur che Vus pajais ils quints fiscals ch'èn gist vegnids tramess e da survegnir pia ils proxims quints fiscals sin via electronica.
Uschia na facilitais Vus betg mo la lavur a Vus sezs, mabain schanegiais er anc l'ambient cun quai che Vus gidais a reducir il consum da palpiri.

Adina cur che Vus registrais in quint fiscal en l'e-banking – in quint, tar il qual l'administraziun chantunala da taglia è la facturanta – duessas Vus vegnir rendì attent che Vus pudais pajar quest quint en il futur cun agid d'in quint electronic. Quai As permetta er da pajar ils quints fiscals d'autras persunas (mandants, avugadads, uffants e.u.v.).

Quai vul dir che Vus pudais As annunziar per singuls retschaviders da quints e per singuls geners da taglia. Sche Vus As decidais pli tard da na betg pli profitar da quest servetsch, annullais Vus Vossa inscripziun sco participant per tut ils retschaviders da quints e per tut ils geners da taglia tar l'administraziun chantunala da taglia e Vus ed ils auters retschaviders da quints survegnis tut ils proxims quints da taglia puspè sin palpiri.

In clic e pajà!

Sche Vus vulais As infurmar da princip davart ils quints electronics, pudais Vus far quai sut il suandant link http://www.e-rechnung.ch. Là chattais Vus indicaziuns e tips nizzaivels che stattan en connex cun ils quints electronics, tranter auter vegni er declerà, co che Vus vegnis tar in numer da participaziun. Quel numer duvrais Vus, ultra dal numer dal contract dad e-banking (tar ina banca svizra u tar la Post Finance) per As participar als quints electronics.
Per quest motiv stuais Vus As drizzar principalmain a Vossa banca, tar la quala Vus avais in contract dad e-banking, sche Vus avais dumondas davart il tema "E-banking e quint electronic".

Sche Vus avais dumondas spezialas davart il quint fiscal sin via electronica, As dat gugent infurmaziuns il support da quints electronics da l'administraziun chantunala da taglia.

E-mail: eRechnung@stv.gr.ch
Nr. da tel.: +41 81 257 33 50