Navigation

Inhaltsbereich

Stausee Valle di Lei
Gebäudehüllensanierung
postautodeck

L'uffizi d'energia e da traffic è il center da cumpetenza chantunal per dumondas en ils secturs da l'energia e dal traffic public. Nus infurmain e cussegliain, iniziain projects e surpigliain incumbensas legalas.

En il sectur da l'energia essan nus cumpetents per surdar concessiuns e per approvar projects concernent l'utilisaziun da la forza idraulica. Nus essan responsabels per exequir la legislaziun d'energia, manain il post da certificaziun da Minergie e sustegnain ils programs per promover l'energia. L'utilisaziun da la forza idraulica e d'autras funtaunas d'energia regenerabla sco er l'utilisaziun persistenta ed effizienta da l'energia tutgan tar ils temas centrals da l'uffizi d'energia e da traffic. Il post da cussegliaziun d'energia dat infurmaziuns fidadas a persunas privatas ed ad interpresas, per exempel davart l'effizienza energetica e davart l'utilisaziun d'energias regenerablas.

En il sectur dal traffic public essan nus cumpetents per la planisaziun strategica e per la coordinaziun vicendaivla da tut il traffic public en il chantun Grischun. Nus coordinain il traffic public da la viafier e dal bus ed essan cumpetents per la planisaziun, per la projectaziun e per la realisaziun da projects a favur d'in traffic public prospectiv. Bunas colliaziuns cun la rait da viafier naziunala ed internaziunala sco er colliaziuns regularas e frequentas en il traffic regiunal e d'aglomeraziun èn d'impurtanza centrala per mantegnair e per sviluppar vinavant il Grischun sco spazi da viver, sco spazi turistic e sco spazi economic.

Il Center da cumpetenza per la mobilitad coordinada (CMC) sustegna gruppas en mira en sco er ordaifer il chantun pertutgant tut las dumondas da la coordinaziun da la mobilitad e da la planisaziun dal traffic:
- cumbinar ils meds da traffic per persunas e per rauba
- planisar la mobilitad en il triangul da planisaziun infrastructura, vehichels e purschida
- perfecziunar e realisar la strategia da mobilitad dal chantun tenor il nov plan directiv chantunal
- plattafurma d'infurmaziun/post da consultaziun per gruppas en mira internas ed externas inclusiv la publicitad e la politica