Navigaziun principala

Cuntegn da la pagina

Rapport mensil davart ils animals da rapina gronds, november 2020

Resumaziun
Il november è il dumber d'attatgas d'animals da rapina gronds cunter animals da niz stà tuttina bass sco durant il mais precedent. Percunter èn vegnidas annunziadas a l'Uffizi da chatscha e pestga dal Grischun pli savens observaziuns da lufs e da lufs-tscherver che durant ils mais passads. Indicaziuns che urs brins e schacals mellens sajan preschents n'èn vegnidas fatgas naginas.

Stgarpadas d'animals da niz
Il november 2020 ha l'Uffizi da chatscha e pestga dal Grischun confermà in cas, nua ch'ina nursa è vegnida stgarpada da lufs. Quai è capità en il Partenz. Tenor il stadi actual èn vegnids confermads l'onn 2020 tut en tut 244 animals da niz stgarpads da lufs, numnadamain 225 nursas, 17 chauras, 1 vadè ed 1 asen.

Ulteriuras cumprovas d'animals da rapina gronds
Il november èn plinavant vegnidas annunziadas a l'Uffizi da chatscha e pestga dal Grischun var 120 cumprovas directas (observaziun/urlim) u indirectas (fastizs/excrements/stgarpadas) da lufs. La gronda part da las annunzias deriva da la Surselva. Observaziuns èn però er puspè vegnidas fatgas en las regiuns Alvra, Viamala, Landquart, Partenz, Plaun, Scanvetg ed Engiadina.

Dal luf-tscherver èn vegnidas registradas 33 observaziuns. Las observaziuns dal luf-tscherver derivan da la Surselva, da l'Engiadina, dal Signuradi sco er da la regiun Viamala.

Gremi: Uffizi da chatscha e pestga
Funtauna: rg Uffizi da chatscha e pestga
Data: 30-11-2020