Navigation

Inhaltsbereich

Cumprovas d'animals da rapina gronds
Durant ils mais da fanadur e d'avust è il dumber da las cumprovas d'animals da rapina gronds creschì levamain en cumparegliaziun cun ils mais precedents. Il fanadur èn vegnidas furnidas 44 cumprovas da lufs e 12 cumprovas da lufs-tscherver. L'avust è quest dumber da cumprovas creschì sin 81 tar ils lufs e sin 20 tar ils lufs-tscherver. Dapi il cumenzament da l'onn èn vegnids cumprovads geneticamain fin ussa 37 differents lufs, da quels 10 animals feminins e 27 animals masculins. Il cumenzament d'avust ha ultra da quai pudì vegnir observà in urs en l'Engiadina Bassa. Il lieu da dimora actual da quest urs è per il mument nunenconuschent. Da tge urs ch'i sa tracta è medemamain anc nunenconuschent.

Furmaziun da trieps
Durant ils mais da fanadur e d'avust èn vegnidas constatadas trais reproducziuns. La primavaira passada ha il triep dal Beverin survegnì per la terza giada pitschens. La grondezza dal letg ha importà 7 lufs giuvens. Cun 6 lufs giuvens ha er il triep da Stagias parturì per la segunda giada. Ina cumprova speziala è vegnida furnida la fin d'avust d'ina trapla fotografica da la surveglianza da chatscha: datiers dal portal sid dal San Bernardin ha ina trapla fotografica tschiffà in luf giuven. Cun gronda probabilitad èsi da presumar in triep ch'è sa furmà da nov. Nunenconuschenta è la situaziun vinavant tar ils trieps da Valgronda, dal Piz Bargias, da Muchetta e da Morobbia sco er dal Calanda.

Animals da niz stgarpads
Durant ils mais da fanadur e d'avust èn s'augmentadas cleramain – cun l'alpegiada – las attatgas d'animals da rapina gronds, particularmain dal luf, sin muntaneras d'animals da niz. Las cifras pon ins leger en la tabella qua sutvart. Durant la perioda dal 1. da schaner fin ils 31 d'avust 2021 han ins stuì registrar 220 nursas e chauras stgarpadas.

Stgarpadas d'animals da niz tras il luf sch. fav. mar. avr. ma. zer. fan. avu. sett. oct. nov. dec. total
Nursas - - - - 19 29 72 78



198
Chauras 1 - - - - 4 - 7



12

 

Stgarpadas d'animals da niz tras l'urs sch. fav. mar. avr. ma. zer. fan. avu. sett. oct. nov. dec. total
Nursas - - - - - - - 10



10
Chauras - - - - - - - -



-

 

Animals da niz blessads
Ultra dals animals da niz stgarpads ha il luf blessà durant il fanadur 5 nursas, 2 asens ed 1 vadè. L'avust èn quai stads 14 nursas, 1 asen, 2 vadels e 3 vatgas. Tenor las enconuschientschas actualas èn quests animals guarids. Ils animals da niz che han stuì vegnir mazzads d'urgenza figureschan tar ils animals stgarpads.

Muntaneras d'arments cun cumportaments problematics
Durant il fanadur e l'avust han differents manaschis purils annunzià tut en tut 10 eveniments cun muntaneras d'arments malruassaivlas, tar las qualas in connex cun il luf è vegnì confermà u supponì. Quests eveniments èn repartids en la Surselva, sin il massiv dal Calanda, en il Partenz, en Valragn ed en il Surses.

Animals da rapina gronds cun cumportaments problematics
Durant il fanadur e l'avust èn vegnidas annunziadas a l'Uffizi da chatscha e pestga 81 observaziuns d'in u da plirs lufs. Sin trais da quests inscunters èn vegnids constatads lufs cun cumportaments problematics tenor l'agiunta 5 dal Concept Luf en Svizra. Indicaziuns detagliadas davart cas spezials e davart mesiras da regulaziun tras l'Uffizi da chatscha e pestga pon vegnir legidas en ulteriuras notizias d'acta che sa chattan sin la pagina d'internet.