Pervia da lavurs pretensiusas vi dals conducts d'ovra e pervia da l'installaziun da colliaziuns supplementaras cun la rait da chalur a distanza po la sanaziun da la Via Nova a Domat vegnir terminada pir la primavaira 2020.

Dapi la primavaira 2019 vegn sanada la Via Nova en il vitg da Domat. En spezial vegn meglierada la segirezza cun construir ina colliaziun nuninterrutta per las pedunas ed ils pedunas. A medem temp renovescha la vischnanca da Domat ils conducts d'ovra, e la corporaziun da chalur da Domat installescha conducts da chalur a distanza.

A partir dals 7 da december 2019 è la Via Nova puspè averta

Actualmain vegnan exequidas las lavurs da la settavla dad otg etappas. Malgrà ch'ins ha prendì a temp mesiras (p.ex. temps da lavur pli lungs, lavur durant las sondas e.u.v.), n'èsi betg stà pussaivel da cumpensar dal tuttafatg il retard ch'è resultà pervia da conflicts en connex cun ils conducts d'ovra sco er pervia da las colliaziuns supplementaras cun la rait da chalur a distanza.

En consequenza da quest retard, ma er perquai che l'atun è avanzà e l'enviern pudess arrivar da tut temp, sto l'otgavla etappa da las lavurs da construcziun vegnir spustada sin la primavaira 2020. Quest onn vegn terminada la sanaziun fin al restaurant "Halla", uschia che la Via Nova po puspè vegnir averta per il traffic a partir dals 7 da december 2019.

Realisaziun da l'otgavla etappa la primavaira 2020

Tut tenor l'aura vegnan exequidas las lavurs principalas da l'otgavla etappa previsiblamain dals 24 da favrer 2020 fin ils 7 d'avrigl 2020. Ulteriuras infurmaziuns davart il project da construcziun chattais Vus sin il fegl d'infurmaziun da l'uffizi da construcziun bassa dal Grischun dal favrer 2019. La serrada da la Via Nova, ch'è previsa la primavaira 2020, sco er l'organisaziun da la circulaziun dal traffic vesais Vus sin il suandant plan da survista actualisà.

L'uffizi da construcziun bassa dal Grischun e la vischnanca da Domat supplitgeschan las abitantas ed ils abitants sco er las participantas ed ils participants dal traffic d'avair la chapientscha necessaria per las restricziuns durant las lavurs da construcziun.

Plan da survista actualisà:

Link:

Plan da survista senza inscripziun